INIULAT na naglabas na umano ng warrant of arrest ang International Criminal Court (ICC) laban kay Sen. Ronald “Bato” dela Rosa, habang isinasagawa na rin umano ang koordinasyon para sa posibleng pagpapatupad nito sa pamamagitan ng mga channel ng Interpol, ayon sa isang mataas na source sa The Hague na pamilyar sa usapin.

Ayon sa source, itinuturing na “seryoso at napipinto” ang naturang development, kasabay ng impormasyong nais umano ng ICC na maiharap si dela Rosa sa tribunal bago pormal na magsimula ang paglilitis kay dating Pangulong Rodrigo Duterte sa huling bahagi ng buwang ito.

“According to information circulating here, the warrant is real and has already been released,” ayon sa source.

Dagdag pa nito, isinasagawa na umano ang agarang mga mekanismo para sa pagpapatupad nito “through proper channels,” kabilang ang posibleng koordinasyon sa Interpol.

Wala pang inilalabas na pampublikong kumpirmasyon ang ICC hanggang sa oras ng paglalathala, at wala pa ring opisyal na pahayag ang mga awtoridad ng Pilipinas hinggil sa iniulat na warrant.

Si dela Rosa, dating hepe ng Philippine National Police at isa sa pinakamalalapit na kaalyado ni Duterte noong kampanya kontra droga ng administrasyon, ay matagal nang iniuugnay sa imbestigasyon ng ICC kaugnay ng umano’y crimes against humanity na konektado sa war on drugs ng pamahalaan.

Ipinagpapatuloy ng tribunal na nakabase sa The Hague ang imbestigasyon nito sa kabila ng paulit-ulit na pagtutol ng mga kaalyado ni Duterte na kumukuwestiyon sa hurisdiksyon ng korte matapos umatras ang Pilipinas sa Rome Statute noong 2019.

Dumating ang ulat na ito habang tumitindi ang atensyon sa nalalapit na pagdinig ni Duterte sa ICC, kung saan mahigpit na binabantayan ng mga observer kung may iba pang indibidwal na konektado sa anti-drug campaign ang ipapatawag o aarestuhin.

“This is being treated as serious and imminent,” sabi ng source, patungkol sa mga usaping umiikot ngayon sa mga taong sumusubaybay sa mga proceedings sa The Hague.

Ayon kay Remulla, handa ang 10,000 tauhan para sa posibleng pag-aresto ng ICC kay Bato

Sinabi nitong Sabado ni Department of the Interior and Local Government (DILG) Secretary Jonvic Remulla na naghahanda ang mga awtoridad ng 10,000-man task force para sa posibleng malawakang operasyon upang arestuhin si Sen. Ronald “Bato” dela Rosa sakaling maglabas ng warrant ang International Criminal Court (ICC) laban sa kanya.

Ayon sa mga awtoridad, pakikilusin ang grupo kung mag-uutos ang ICC ng pag-aresto sa senador.

“As of latest update, the DILG is preparing a 10,000 task force for the dragnet operations in case a warrant of arrest for Senator Bato is issued,” ayon kay Remulla sa text message na ipinadala niya sa mga reporter nitong Sabado.

Tumanggi si Remulla na magbigay pa ng dagdag na detalye hinggil sa deployment o kung kailan ito maaaring isagawa.

Gayunman, nilinaw ni Remulla na wala pang natatanggap na warrant of arrest ang mga awtoridad.

Patuloy na isinasagawa ng korte sa The Hague ang imbestigasyon nito sa kabila ng pagtutol ng mga kaalyado ni Duterte na kumukuwestiyon sa hurisdiksyon ng tribunal matapos umatras ang Pilipinas sa Rome Statute noong 2019.

Nakuha ng ICC ang hurisdiksyon kay Duterte at nagkaisang pinagtibay ng tatlong miyembro ng Pre-Trial Chamber (PTC) I ang lahat ng kasong murder at attempted murder laban sa dating pangulo bilang crimes against humanity dahil umano sa pagbuo ng Davao Death Squad (DDS) at pagkontrol sa tinatawag na “Davao model” sa pagsasagawa ng extrajudicial killings laban sa mga pinaghihinalaang sangkot sa droga.