MAHIGIT P1.3 milyong halaga ng shabu ang nakumpiska ng pinagsanib na puwersa ng Philippine Drug Enforcement Agency (PDEA) at Cavite Maritime Police Station sa isang buy-bust noong Biyernes.

Ayon sa ulat ng PDEA na pinamumunuan ni Director General Isagani R. Nerez, nahuli ang suspek na si alyas Geoffrey, 32-anyos na mekaniko, sa Barangay Salinas 1, Bacoor City, dakong alas-11:50 ng hapon.

Nasamsam sa akusado ang humigit kumulang na 200 gramo ng pinaghihinalaang shabu na may halagang P1.36 milyon at ang buy-bust money.

Kasalukuyang nakapiit sa PDEA Region 4-A lockup facility sa Sta. Rosa City, Laguna, ang akusado na nahaharap sa kasong paglabag sa Republic Act No. 9165, o ang Comprehensive Dangerous Drugs Act of 2002.