KAMPO HENERAL MALVAR, Batangas – Nahuli ng kapulisan noong Lunes ang isa sa mga suspek na nagnakaw ng motorsiklo sa New Metro Darasa Cockpit Arena, Barangay Darasa, Tanauan City sa Batangas.

Ang 47-anyos na biktima ay kinilalang si alyas “Mauro” na may asawa, isang tricycle driver at residente ng Brgy. Turbina, Calamba City.

Ang isa sa mga suspek na nasakote ay kinilalang si alyas “John” na 30-anyos, may asawa at taga-Brgy. San Bartolome, Sto. Tomas City, Batangas.

Tinutugis pa ang kanyang kasama na si alyas “Raniel” ng Brgy. San Vicente, Sto. Tomas City, na 27-anyos, may asawa at walang trabaho.

Ayon sa report ng biktima sa mga imbestigador ng Tanauan City Police Station, ang kanyang Kawasaki Barako na motorsiklo na may sidecar ay ninakaw mula sa cockpit arena parking area bandang alas-3:30 ng umaga noong Lunes.

Kalaunan ay nakita ng biktima ang isang motorsiklo na tumutugma sa kanyang sasakyan base sa paglalarawan na naka-post sa Facebook Marketplace.

Humingi siya ng tulong sa mga pulis at nakipagkita siya bandang alas-10:30 ng gabi sa nagbebenta ng nasabing motorsiklo sa Brgy. Población 1, Tanauan City, na nagresulta sa pagkakadakip ng suspek at sa pagbawi ng nasabing motorsiklo.

Hindi natagpuan ang sidecar.

Sa panahon ng pag-aresto, marahas umanong nanlaban ang suspek at sinubukang salakayin ang mga opisyal, ngunit nagawa siyang mapasuko.