Calendar
Opisyal ng DPWH kimupirma na bilyong piso ginastos sa flood control sa Davao noong pandemya
KINUMPIRMA ng opisyal ng Department of Public Works and Highways (DPWH) nitong Martes na bilyon ang alokasyon sa flood control projects noong may COVID-19 pandemic, sa gitna ng pangungutang ng gobyerno para pondohan ang vaccines, medical supplies at sahod ng health workers.
Sa House Infra Comm hearing, kinumpirma ni DPWH Undersecretary for Planning and Information Technology Maria Catalina Cabral na in-oversee ng kanyang opisina ang line-item budgets para sa malakihang flood control allocations noong 2020 and 2021, sa kasagsagan ng mga lockdown.
Ayon sa budget records, noong 2020, ang administrasyon ni dating Pangulong Rodrigo Duterte ay may panukalang P4.6 bilyon para sa flood control projects pero ang pinal na General Appropriations Act (GAA) ay pinalaki pa sa P13.745 bilyon.
Noong 2021, nagmungkahi ang Duterte administration ng P9.67 bilyon, na lumobo sa P25 bilyon sa enacted budget.
Tinanong ni Deputy Speaker at Iloilo 1st District Rep. Janette Garin si Cabral kung dapat ay ginamit ang pondo sa pandemic response imbes na sa infrastructure.
“Sa personal n’yo pong pananaw, if you were the decision-maker, Usec. Cathy Cabral, sa tingin n’yo ba mas maiging ginastos ito sa pandemya at hindi na tayo nangutang kesa ginastos sa flood control?” usisa ni Garin.
“You asked for my personal opinion and I would say yes,” tugon ni Cabral.
Hiningi rin ni Manila 3rd District Rep. Joel Chua kay Cabral na kumpirmahin ang mga reports na ang distrito ni Davao City 1st District Rep. Paolo Duterte ay nakakuha ng P51 bilyong infrastructure projects sa huling tatlong taon ng Duterte administration.
Kinumpirma ni Cabral ang mga numero, na base sa records ng DPWH Programming Division at ng General Appropriations Act.
Si Cabral ay na-link sa diumano’y premature insertions sa panukalang 2026 national budget, na kanyang pinabulaanan.
Sinabi ni Senate President Pro Tempore Panfilo Lacson na isang caller na nag-identify bilang “Undersecretary Cabral” ang tumawag sa staff ni noo’y Minority Leader at ngayo’y Senate President Vicente “Tito” Sotto III matapos ang May 2025 senatorial elections at inimbita silang mag-submit ng proposed insertions para sa 2026 National Expenditure Program.
Dinenay ni Cabral na siya ang tumawag.
