ISANG pabrika na nasa loob ng First Cavite Industrial Estate sa Dasmarinas City, Cavite ang nasunog nitong Biyernes ng umaga.

Batay sa ulat ng Bureau of Fire Protection (BFP), nagsimula ang sunog dakong 9:33 ng umaga at inilagay sa unang alarma matapos ang ilang minuto.

Mabilis na kumalat ang apoy kaya’t agad din itong itinaas sa ikalawang alarma bago tuluyang naapula dakong 12:09 ng tanghali.

Wala namang naiulat na nasugatan sa insidente.

Sa ngayon, patuloy ang ginagawang imbestigasyon ng BFP para matukoy ang dahilan ng sunog at magkanong halaga ang naging pinsala nito.