PINASINUNGALINGAN ng Armed Forces of the Philippines (AFP) ang kumakalat na balitang may mga sundalong nagbitiw sa puwesto bilang suporta kay dating Pangulong Rodrigo Duterte kaugnay ng kanyang pagkakadakip kamakailan.

Sa paglilinaw ni AFP spokesperson Col. Francel Margareth Padilla, hindi beripikado ang mga ulat ng pagbibitiw ng kanilang mga sundalo, kaya’t hinihikayat niya ang publiko na huwag basta-basta maniwala o magpakalat ng hindi kumpirmadong impormasyon.

Dagdag pa niya, nananatiling propesyonal, buo at walang kinikilingan ang AFP pagdating sa mga isyung pampulitika.

Binibigyang-diin niya na nakatuon ang AFP sa kanilang tungkulin na ipagtanggol ang bayan at sundin ang batas.