TINAWAG ni retired Chief Justice Artemio Panganiban ang Senado na “Supreme Court of impeachment,” ngunit nilinaw na maaari pa ring makialam ang Supreme Court kung gagamitin ng impeachment court ang kapangyarihan nito nang may grave abuse of discretion.

Inihayag ito ni Panganiban matapos tanungin ni Senator-Judge Panfilo “Ping” Lacson kung makatutulong ang paghingi ng Senado ng opinyon ng apat na dating mahistrado upang mapakitang maingat nitong pinag-aralan ang pinagtatalunang voting threshold sa impeachment trial ni Vice President Sara Duterte.

Tinukoy niya sina Panganiban, retired Chief Justice Reynato Puno at retired Associate Justice Adolfo Azcuna, na personal na humarap sa impeachment court, at si retired Chief Justice Hilario Davide Jr., na nagsumite ng memorandum habang nagpapagaling mula sa isang medical procedure.

“You are the Supreme Court of impeachment. Your will shall prevail,” ani Panganiban.

Nakabatay ang pahayag sa Article XI, Section 3(6) ng 1987 Constitution, na nagbibigay sa Senado ng sole power to try and decide all cases of impeachment.

Hindi naman nangangahulugan ang sinabi ni Panganiban na hindi na maaaring suriin ng Supreme Court ang anumang aksyon ng Senado.

Ayon sa kanya, hindi maaaring baligtarin ng Supreme Court ang pasya ng impeachment court dahil lamang hindi ito sang-ayon sa desisyon. Maaari lamang itong makialam kapag may grave abuse of discretion amounting to lack or excess of jurisdiction.

“The question is, did you commit grave abuse of discretion? Were you capricious? Were you whimsical? Were you arbitrary in making your decision?” ani Panganiban.

“It’s not a question of whether the Supreme Court agrees with you or not. You are given that mandate, that power, that duty by our Constitution,” aniya.

Gayunman, hindi garantiya ang konsultasyon na hindi na maaaring kuwestiyunin sa Supreme Court ang magiging desisyon ng Senado.

Magkakaiba ang pananaw ng mga amici curiae sa kahulugan ng probisyong nagsasabing kailangan ang pagsang-ayon ng two-thirds of all the Members of the Senate upang ma-convict ang isang respondent.

Nakatakdang iharap ng prosecution at defense ang kanilang mga argumento sa threshold issue bago bumoto ang mga senator-judges sa hamon ni Tulfo.