NAISAULI sa tunay na may-ari ang pouch na may lamang P36,925 na naiwan sa security screening checkpoint ng Davao International Airport noong Hulyo 7.

Mga Security Screening Officers (SSOs) ng Office for Transportation Security (OTS) ang nagsoli ng pouch, ayon sa report.

Sa routine screening, napansin ni SSO Robert Jake Lastica ang pouch na naiwan sa service tray ng paliparan kaya iniulat kay Sheila Barrios para sa wastong dokumentasyon.

Makalipas ang ilang minuto, isang pasahero ang lumapit sa OTS upang iulat ang kanyang nawawalang gamit. Matapos ang masusing beripikasyon ng pagmamay-ari at nilalaman, matagumpay na naibalik ang pouch sa pasahero nang buo.

Nagpasalamat ang pasahero sa pagkakasauli ng kanyang pouch.