TINUNTON ng prosekusyon nitong Miyerkules ang dalawang BPI fund streams na sinabi nitong umabot sa humigit-kumulang P96 milyon sa pamamagitan ng time deposits at sunod-sunod na manager’s checks na kaugnay ng Julia Vargas account nina dating Pangulong Rodrigo Duterte at Vice President Sara Duterte.

Sa Day 35 ng impeachment trial ni Vice President Sara Duterte, pinatotohanan ni BPI Central Manila Branches Division Head Marwin Galvez ang mga bank record na nagsimula sa P40.65-milyong time deposit na binuksan noong Enero 22, 2010.

Ayon kay Galvez, nakapangalan ang time deposit kina Rodrigo Roa Duterte at Sara Z. Duterte at naka-link sa settlement account ending 9539 sa BPI Julia Vargas branch.

Ni-roll over ang time deposit nang 12 beses at umabot sa humigit-kumulang P41.72 milyon sa huling renewal noong Pebrero 11, 2011, ayon kay Galvez.

Noong Marso 9, 2011, P41,721,035.62 ang na-credit sa settlement account ending 9539 matapos mag-mature ang time deposit, ayon sa mga debit at credit memo na iniharap sa korte.

Sa parehong araw, ayon kay Galvez, ang parehong halaga ay inilagay sa manager’s-check settlement account ng BPI para sa pag-isyu ng manager’s check.

Ipinaliwanag ni Galvez na ang manager’s check ay iniisyu at pinopondohan ng bangko. Kapag na-issue ito, ibinabawas ang halaga sa account ng purchaser at inililipat sa manager’s-check settlement account ng bangko.

Noong Oktubre 20, 2011, isa pang manager’s-check transaction para sa halos kaparehong P41.72 milyon ang lumitaw sa records.

Ang resulting manager’s check ay may markang unutilized, na ayon kay Galvez ay nangangahulugang hindi ito nagamit para sa nilalayong purpose.

Nagpakita rin ang prosekusyon ng mga sumunod na manager’s checks sa parehong P41.72-milyong stream.

Isang manager’s check na may petsang Abril 19, 2012 ang tinukoy na payable kay dating Pangulong Rodrigo Duterte.

Noong Oktubre 7, 2013, isa pang manager’s check na P41,721,035.62 ang tinukoy na payable din kay dating Pangulong Rodrigo Duterte.

Sinabi ng prosecution counsel na may hiwalay ding humigit-kumulang P55-milyong time-deposit stream na naging manager’s checks sa parehong panahon.

“So it’s a total of P96M,” ayon sa prosekusyon.

Ayon sa prosekusyon, layunin nitong magpakita ng pattern kung saan ang perang ginawang manager’s check ay hindi na lumilitaw sa deposit-account balance habang nasa manager’s-check settlement account ng bangko.

“Yung manager’s check na pinapaikot, hindi nakikita sa year-end balance kasi nakafloat yung pera na yun,” ayon sa prosekusyon.

Kinumpirma ni Galvez na nababawasan ang balance ng purchaser kapag na-issue ang manager’s check.

Kapag hindi nagamit ang manager’s check at ibinalik ito sa bangko, sinabi ni Galvez na maaaring maibalik ang halaga sa account ng purchaser.

Hindi naman kinumpirma ni Galvez ang sinasabi ng prosekusyon na sadyang ginagamit ang manager’s checks upang pansamantalang mawala ang pera sa account balance.

“May mga nangyayari talaga na ang biniling manager’s check ay hindi po nagamit,” ani Galvez.

Nang tanungin kung may mga kliyenteng sadyang bumibili ng manager’s checks upang ibalik lamang ang mga ito makalipas ang ilang buwan, sinabi niyang hindi niya masasagot ang kanilang layunin.

“With all due respect, Your Honor, I cannot comment on that,” ani Galvez.

Nagpatuloy ang prosekusyon sa mga dokumentong may petsang Marso 28, 2014.

Apat na magkakahiwalay na letter of instruction ang nag-authorize ng tig-P20-milyong transfer mula sa account ending 9539, o kabuuang P80 milyon.

Ayon sa mga dokumentong binasa sa pagdinig, ang mga instruction ay para sa apat na Peso plans.

Sa isa pang BPI record na may petsang Mayo 30, 2016, tinukoy ni Galvez ang manager’s check No. 20536 na nagkakahalaga ng humigit-kumulang P16.85 milyon at payable kay Samuel C. Uy.

Tinukoy ng prosecution counsel ang naturang halaga bilang bahagi ng humigit-kumulang P96-milyong trail na sinusundan nito.

Hindi sinabi ni Galvez na ang P16.85-milyong manager’s check na payable kay Uy ay direktang nagmula sa orihinal na P40.65-milyong time deposit.

Tinutulan naman ng depensa ang paggamit sa mga transaksyong nagsimula noong 2010 at 2011 dahil nangyari ang mga ito bago ang termino ni Vice President Sara Duterte bilang bise presidente.

Pinayagan ng impeachment court ang pagpresenta ng mga lumang transaksyon bilang posibleng pattern o baseline, ngunit nilinaw na hindi ito itinuturing na hiwalay na impeachable act laban kay Vice President Sara Duterte.

Sa cross-examination, binigyang-diin ng depensa na or account ang joint account.

Ipinaliwanag ni Galvez na sa joint or account, maaaring pumirma at magbigay ng instruction ang alinman sa mga depositor na nakapangalan sa account.

Kinumpirma rin ni Galvez na may specimen signature si Vice President Sara Duterte sa signature card ng account.

Itinuro naman ng depensa na ang mga manager’s-check applications na ipinakita nito ay pirmado ni dating Pangulong Rodrigo Duterte.

Hindi agad kinumpirma ni Galvez kung may iba pang withdrawal o transaction instruction na pirmado ni Vice President Sara Duterte, at sinabi niyang kailangan niyang suriin ang buong set ng dokumento.

Nang tanungin kung masasabi niyang may buong kaalaman o walang kaalaman si Vice President Sara Duterte sa mga transaksyon, sinabi ni Galvez na hindi niya ito masasabi.

Wala pang pasya ang impeachment court sa bigat ng mga BPI record sa Article II laban kay Vice President Sara Duterte.