REKLAMO sa impeachment laban kay PBBM, naipasa na sa Tanggapan ng Speaker, ayon sa House Secretary General Garafil

Ang reklamong impeachment na inihain laban kay Pangulong Ferdinand “Bongbong” R. Marcos Jr. ay pormal nang naipasa sa Tanggapan ng Speaker nitong Martes, kinumpirma ni House Secretary General Atty. Cheloy E. Velicaria-Garafil. Ito ang hudyat ng pagsisimula ng panloob na proseso ng Kamara sa pagtupad nito sa mandato ng Konstitusyon.

“Alinsunod sa itinakdang pamamaraan, ipinasa ng Tanggapan ng Secretary General ang beripikadong reklamong impeachment sa Tanggapan ni Speaker Faustino ‘Bojie’ G. Dy III para sa nararapat na aksyon,” pahayag ni Garafil nitong Miyerkules.

Binigyang-diin niya na administratibo lamang ang papel ng kanyang tanggapan at mahigpit na ginagabayan ng Konstitusyon, mga patakaran ng Kamara, at matagal nang umiiral na mga alituntunin.

Ipinaliwanag ni Garafil na sa pagtanggap ng anumang reklamong impeachment, sinisiguro ng Tanggapan ng Secretary General na ito ay maayos na naitatala, nare-record, at naipapasa sa tamang tanggapan, at binigyang-diin na ang paunang hakbang na ito ay upang mapanatili ang kaayusan at due process.

Ang reklamong impeachment, na inihain ng abogadong si Andre de Jesus noong Enero 19 at inendorso ni House Deputy Minority Leader at Pusong Pinoy Party-list Rep. Jett Nisay, ang kauna-unahang reklamong isinampa laban kay Pangulong Marcos mula nang siya ay maupo sa puwesto.