ISANG tindero ng isda sa Albay ang nanalo ng P65.991 milyong jackpot prize ng Grand Lotto 6/55 sa bola noong Enero 15.

Ang lalaki na mayroong anim na anak ang nag-iisang nakakuha ng winning number combination na 39-29-09-21-19-20. Ang mga numero ay kombinasyon umano ng mga kaarawan ng kanyang mga mahal sa buhay.

May 28 taon na umanong sumusubok ng kanyang swerte ang lalaki sa lotto.

“Bibili na kami ng aming sariling bahay at lupa,” sabi ng lalaki ng tanungin kung ano ang plano nitong gawin sa napanalunan.

Naniniwala ang lalaki na ang kanyang natanggap ay isang blessing at ang Philippine Charity Sweepstakes Office (PCSO) ang naging tulay upang maabot ang kanyang mga pangarap.