NANAWAGAN si Tingog Partylist Rep. Jude A. Acidre sa Philippine Health Insurance Corporation o Philhealth na itaas ng 20 porsyento ang lahat ng case rate nito.

Ayon kay Acidre hindi na angkop sa panahon ang halaga ng mga case rate ng Philhealth kaya nararapat lamang na itaas na ito upang matulungan ang mga pasyente.

Sinabi ni Acidre na dahil maliit ang case rate na binabayaran ng Philhealth ay kinakailangan pang maghanap ng mga mahihirap na pasyente ng maipandaragdag sa kanilang bayarin.

Ang pagtataas umano ng case rate ay makatutulong upang mabawasan ang paghihirap ng mga pasyente at kanilang pamilya.

Binigyan-diin ni Acidre ang kahalagahan na maging accessible sa lahat ng Pilipino ang de kalidad na health care system.