LABING-ISANG boto, hindi 10, ang kakailanganin para baliktarin ang ruling na nagtakda ng 16-vote conviction threshold sa impeachment trial ni Vice President Sara Duterte kung 20 senator-judges ang dadalo at boboto, ayon sa impeachment court spokesman.

Sinabi ni Atty. Reginald Tongol na kasama sa boboto si Presiding Officer Francis “Chiz” Escudero sa apelang kumukuwestiyon sa nauna niyang ruling na kailangan ang 16 boto upang ma-convict si Duterte.

Sa kalkulasyon ni Tongol, 11 boto ang kakailanganin kung 20 senator-judges, kabilang si Escudero, ang dadalo at boboto.

Ibinatay niya ang unang pahayag sa Section 116 ng Rule XLI ng mga tuntunin ng Senado na nagsasabing hindi boboto ang Senate President maliban kung magiging decisive ang kaniyang boto.

Maaaring gamiting pandagdag ang Senate rules kapag walang tiyak na probisyon sa impeachment rules.

Ngunit ipinaalam sa kanya nina Escudero at Senate Secretary Renato Bantug Jr., na nagsisilbing clerk of court, na batay sa kanilang pag-aaral ay kasali sa botohan ang presiding officer.

“Kailangan po hindi 10 kundi 11 para ma-overturn iyong kanyang ruling,” sabi ni Tongol.

Sinabi rin ni Tongol na inaasahan niyang boboto si Escudero laban sa apela. “But we expect his vote to be against the appeal,” aniya.

Nananatiling umiiral ang 16-vote threshold na itinakda sa ruling ni Escudero habang hindi pa ito nababaligtad o nababago ng impeachment court.

Nakatakdang dinggin ng impeachment court sa Setyembre 16 ang mga pananaw ng mga amici curiae o friends of the court tungkol sa voting threshold.