DALAWANG suspek sa pagbebenta ng ilegal na droga noong Huwebes ang nahuli ng mga pulis na may dala pang baril na walang lisensya sa Brgy. Bañadero, Tanauan City, Batangas.

Kinilala ang mga suspek na sina alyas Michael at Jojo.

Naaresto ang dalawa dakong alas-12:45 ng hatinggabi ng City Drug Enforcement Team (CDET) ng Tanauan City police, ayon sa report.

Nakumpiska sa kanila ang tinatayang 1.2 na gramo ng shabu na may presyong P8,160, buy-bust money, sling bag at isang cal .38 na baril na may limang bala.

Sasampahan ang dalawa ng mga kasong paglabag sa RA 9165 (Comprehensive Dangerous Drugs Act of 2002) at RA 10591 (Comprehensive Firearms and Ammunition Regulation Act).