𝗕𝗔𝗚𝗔𝗠𝗔’𝘁 𝗻𝗮𝗹𝗮𝗹𝗮𝗽𝗶𝘁 𝗻𝗮 𝗮𝗻𝗴 𝗶𝗸𝗮𝘁𝗹𝗼𝗻𝗴 𝗦𝘁𝗮𝘁𝗲 𝗼𝗳 𝘁𝗵𝗲 𝗡𝗮𝘁𝗶𝗼𝗻 𝗔𝗱𝗱𝗿𝗲𝘀𝘀 (𝗦𝗢𝗡𝗔) 𝗻𝗶 𝗣𝗿𝗲𝘀𝗶𝗱𝗲𝗻𝘁 𝗕𝗼𝗻𝗴𝗯𝗼𝗻𝗴 𝗠𝗮𝗿𝗰𝗼𝘀, 𝗝𝗿. 𝗵𝗶𝗻𝗱𝗶 𝗽𝗮𝗿𝗶𝗻 𝗻𝗮𝗴𝗽𝗮𝗽𝗮-𝗮𝘄𝗮𝘁 𝘀𝗶 𝗛𝗼𝘂𝘀𝗲 𝗗𝗲𝗽𝘂𝘁𝘆 𝗦𝗽𝗲𝗮𝗸𝗲𝗿 𝗮𝘁 𝗖𝗲𝗯𝘂 𝟱𝘁𝗵 𝗗𝗶𝘀𝘁. 𝗖𝗼𝗻𝗴. 𝗩𝗶𝗻𝗰𝗲𝗻𝘁 𝗙𝗿𝗮𝗻𝗰𝗼 “𝗗𝘂𝗸𝗲” 𝗗. 𝗙𝗿𝗮𝘀𝗰𝗼 𝘀𝗮 𝗽𝗮𝗴𝗯𝗶𝗯𝗶𝗴𝗮𝘆 𝘀𝗲𝗿𝗯𝗶𝘀𝘆𝗼 𝗽𝗮𝗿𝗮 𝘀𝗮 𝗸𝗮𝗻𝗶𝘆𝗮𝗻𝗴 𝗺𝗴𝗮 𝗸𝗮𝗯𝗮𝗯𝗮𝘆𝗮𝗻.

Ilang araw na lamang ang nalalabi bago ang pagbabalik session sa Kamara de Representantes para sa 3rd Regular session ng 19th Congress subalit “non-stop” pa rin si Frasco sa kaniyang serbisyo publiko sa pamamagitan ng pamamahagi nito ng milyon pisong cash assistance.

Personal na tinungo ng Deputy Speaker ang munisipalidad ng Sogod para ipamahagi o i-turn over ang cash assistance na nagkakahalaga ng P4.1 million para sa tinatayang 800 benepisyaryo ng Sogod kabilang na ang bayan ng Borbon.

Ayon kay Frasco, sa panahon na nararamdaman pa rin ng kaniyang mga kababayan ang krisis dulot ng mataas na presyo ng mga pangunahing bilihin gaya ng bigas malaki ang maitutulong aniya ng ipinamahagi nitong financial assistance.

Sabi ni Frasco, magdudulot na ng malaking kaginhawahan para sa mga nakatanggap ng financial assistance ang ipinagkaloob nitong tulong.

“Sa pamamagitan nito ay maiibsan kahit papaano ang pinagdadaanan nilang krisis,” ani Frasco.

Ikinagagalak naman ng kongresista na sa pamamagitan ng kaniyang mga programa ay malaki din ang kaniyang naitutulong para sa kaniyang mga kababayan na dumaranas ng kahirapan.

Tiniyak ni Frasco na sa muling pagbubukas ng session ng Kamara de Representantes marami pa siyang mga nakahandang programa at proyekto para matulungan ang mga mahihirap niyang mga kababayan.

Ipinahayag din ni Frasco na optimistiko siya na magiging maganda at makabuluhan ang magiging laman ng mensahe ni Pangulong Marcos, Jr. sa kaniyang ikatlong SONA sa darating na Lunes (July 22) na tutuon sa mga mahahalagang issues ng bansa.