𝗕𝗜𝗟𝗔𝗡𝗚 c𝗵𝗮𝗶𝗿𝗺𝗮𝗻 𝗻𝗴 𝗛𝗼𝘂𝘀𝗲 𝗖𝗼𝗺𝗺𝗶𝘁𝘁𝗲𝗲 𝗼𝗻 𝗠𝗲𝘁𝗿𝗼 𝗠𝗮𝗻𝗶𝗹𝗮 𝗗𝗲𝘃𝗲𝗹𝗼𝗽𝗺𝗲𝗻𝘁, i𝗸𝗶𝗻𝗮𝗴𝗮𝗴𝗮𝗹𝗮𝗸 𝗻𝗶 𝗠𝗮𝗻𝗶𝗹𝗮 𝟮𝗻𝗱 𝗗𝗶𝘀𝘁. 𝗖𝗼𝗻𝗴. 𝗥𝗼𝗹𝗮𝗻𝗱𝗼 “𝗖𝗥𝗩” 𝗠. 𝗩𝗮𝗹𝗲𝗿𝗶𝗮𝗻𝗼 𝗮𝗻𝗴 𝗶𝗻𝗶𝗹𝗮𝗯𝗮𝘀 𝗻𝗮 𝗽𝗿𝗼𝗴𝗿𝗮𝗺𝗮 𝗻𝗴 𝗟𝗮𝗻𝗱 𝗧𝗿𝗮𝗻𝘀𝗽𝗼𝗿𝘁𝗮𝘁𝗶𝗼𝗻 𝗢𝗳𝗳𝗶𝗰𝗲 (𝗟𝗧𝗢) 𝗽𝗮𝘁𝘂𝗻𝗴𝗸𝗼𝗹 𝘀𝗮 “𝗼𝗻𝗹𝗶𝗻𝗲 𝗱𝗿𝗶𝘃𝗲𝗿’𝘀 𝗹𝗶𝗰𝗲𝗻𝘀𝗲” 𝗽𝗮𝗿𝗮 𝘀𝗮 𝗺𝗴𝗮 𝗢𝘃𝗲𝗿𝘀𝗲𝗮𝘀 𝗙𝗶𝗹𝗶𝗽𝗶𝗻𝗼 𝗪𝗼𝗿𝗸𝗲𝗿𝘀 (𝗢𝗙𝗪𝘀) 𝗮𝘁 𝗺𝗴𝗮 𝗣𝗶𝗻𝗼𝘆 𝗻𝗮 𝗻𝗮𝗻𝗶𝗻𝗶𝗿𝗮𝗵𝗮𝗻 𝘀𝗮 𝗮𝗯𝗿𝗼𝗮𝗱.

Sinabi ni Valeriano na napakaganda ng programa na nakatakdang ipatupad ng LTO hinggil sa tinatawag na “full digitalization” ng kanilang serbisyo sa pamamagitan ng online renewal ng driver’s license para sa lahat ng motorista nasa ibayong dagat man o nasa Pilipinas.

Kasabay nito, pinapurihan din ni Valeriano si President Ferdinand “Bongbong” R. Marcos, Jr. dahil sa naging utos nito upang maipatupad ang programang full digitalization ng LTO na naglalayong pabilisin at gawing epektibo ang lahat ng serbisyo ng pamahalaan para sa lahat ng Pilipino.

Paliwanag pa ng kongresista na sa pamamagitan ng online renewal ng driver’s license na ipatutupad ng LTO, mas pinapadali at pinapagaan nito ang nasabing proseso hindi lamang para sa mga Pinoy na nasa Pilipinas. Bagkos para sa mga OFWs at Pilipinong naninirahan sa iba’t-ibang panig ng mundo.

Ayon pa kay Valeriano, ikinagagalak nito ang naturang programa ng LTO sapagkat nilalayon din nito na mailapit ang serbisyo ng pamahalaan sa mga mamamayan.