DALAWA ang patay at apat ang nasugatan makaraang araruhin ng pampasaherong bus ang isang tricycle nitong Martes ng gabi sa Balite, San Miguel, Bulacan.

Nakilala ang mga nasawi na sina John Christian Estacio, 12-anyos at C-Jay Zapra, 18-anyos pawang mga pasahero ng tricycle.

Isinugod naman sa pagamutan ang dalawa pang pasahero ng tricycle na sina John Zian Zapra, 3-anyos at Carylle Zapra, 16-anyos.

Sugatan din sa aksidente ang driver at konduktor ng bus .

Batay sa inisyal na ulat ng PNP, naganap ang aksidente dakong 7:30 ng gabi sa kahabaan ng Zone 2, Balite , sa nasabing bayan.

Ayon sa mga pasahero ng bus, isang truck ang sumingit sa kanilang linya na iniwasan naman ng kanilang driver.

Gayunman, sa pag-iwas ng bus ay inararo nito ang kasalubong ng tricyle.

Sa lakas ng impact ng aksidente, nawasak ang tricycle , pumailalim at naipit pa sa gulong ng bus ang isang pasahero nito.

Patuloy ang imbestigasyon sa aksidente.