BAHAGYA lamang pinagpawisan ang Imus Braderhood bago payukuin ang Bacolod, 86-68, sa pagpapatuloy ng aksyon sa Manny Pacquiao presents 1xBet-MPBL 2025 Season at the FilOil Flying V Centre sa San Juan City kamakailan.

Nagpasikat si Regie Boy Basibas sa kanyang double-double na 16 points at 19 rebounds upang masungkit ng Imus ang kanilang ika-walong panalo laban sa 10 talo sa round-robin elimination phase ng 30-team tournament, na tinatawag ding “Liga ng “Bawat Pilipino”.

Nakatuwang ni Basibas sina Mark Doligon, na nagtala ng 13 points, six rebounds at six assists, at Ryusei Koga, na nag-ambag ng 10 points, three rebounds at two assists.

Ang undermanned Bacolod team ai pinangunahan nina Mark Ray Dubouzet (21 points) at Aldave Canoy (17 points).

Sa ibang mga laro, pinabagsak ng San Juan Knights ang Pangasinan Heatwaves, 73-66, at giniba ng Mindoro Tamaraws ang Bulacan Kuyas, 103-72.

Nagsanib pwersa sina Michael Calisaan, na umiskor ng 11 points; AC Soberano, Dexter Maiquez at Arvin Gamboa, na may tig nine points; at new recruit JC Cullar, na may eight points, five assists, three rebounds at three steals para sa 15th win sa 16 laro ng Knights.

Bumagsak naman sa overall standings ang Pangasinan sa 10-6 record sa kabila ng 18 points ar six rebounds ni ex-PBA star Vic Manuel, 10 points at 12 rebounds ni Jorey Napoles at 11 points at two rebounds ni Michael DiGregorio.