IPINAHAYAG ng Bureau of Corrections (BuCor) ang buong suporta nito sa panukalang pagsasanib ng BuCor at Bureau of Jail Management and Penology (BJMP).

Ayon kay BuCor Director General Gregorio Pio P. Catapang Jr., ang nasabing inisyatibo ay tugma sa Philippine Medium-Term Development Plan (PDP) 2023–2028 ng administrasyong Marcos, na layuning magkaroon ng iisang sistema para sa penolohiya at koreksyon. Isa itong mahalagang hakbang upang mapabuti ang kahusayan ng sistema ng mga piitan sa bansa, gamit ang pinag-isang yaman at estratehiya upang harapin ang suliranin ng siksikan sa mga kulungan.

Sinabi ni Catapang na may mga bansa na nauna nang nagpapatupad ng ganitong sistema, kung saan pinamamahalaan ng isang ahensiya ang lahat ng pasilidad ng piitan, na nagreresulta sa mas maayos na pamamahala at paggamit ng pondo.

Binanggit din niyang ang panukalang ito ay hakbang tungo sa mas epektibong pamamalakad at pagkakaisa ng mga polisiya at operasyon sa iba’t ibang pasilidad ng kulungan, na layuning mapabuti ang pagpapatupad ng katarungan, pamamahala sa mga bilanggo, at pagsusulong ng rehabilitasyon.

Dagdag pa ni Catapang, sa pagsasama ng dalawang pangunahing ahensya ay mabubuo ang isang mas buo at koordinadong sistema ng pamamahala sa mga kulungan, na nagpapakita ng matibay na paninindigan ng gobyerno sa reforma at modernisasyon ng sistemang pangkoreksyon para mas mapagsilbihan hindi lamang ang mga bilanggo kundi pati ang lipunan.

Layunin din ng pagsasanib na ito na pabutin ang kondisyon sa loob ng mga kulungan, isulong ang rehabilitasyon, at bawasan ang pag-uulit ng krimen (recidivism).

Sa ilalim ng plano, binibigyang-diin din ang mabuting pamamahala at pagprotekta sa karapatang pantao—mga mahahalagang salik sa pagkakaroon ng makatarungan at makataong sistemang koreksyonal, na kaakibat ng hangaring magkaroon ng inklusibo at matatag na lipunan kung saan pantay-pantay ang oportunidad para sa lahat.

Kinilala rin ng PDP 2023–2028 ang malaking papel ng isang maayos na sistemang koreksyonal sa pagtamo ng mas malawak na layunin ng pambansang kaunlaran. Ang pagtatatag ng iisang sistema ay isang mahalagang hakbang tungo sa kahusayan, katarungan, at pagpapahalaga sa karapatang pantao sa loob ng mga piitan sa Pilipinas.