PINANGUNAHAN ni Kalihim ng Katarungan Crispin Remulla ang inagurasyon at pormal na paglilipat ng bagong Bureau of Immigration Warden Facility (BIWF) na matatagpuan sa loob ng Bureau of Corrections (BuCor) Compound sa Muntinlupa City. Ang pasilidad na ito ay magsisilbing pansamantalang tahanan para sa mga dayuhang sumasailalim sa proseso ng deportasyon.

Ang naturang pasilidad, na may sukat na 1,260 metro kuwadrado, ay matatagpuan sa Barracks ng Muntinlupa Juvenile Training Center (MJTC) sa loob ng NBP Reservation.

Ayon kay BuCor Director General Gregorio Catapang Jr., naglaan ang BuCor ng isang ektarya mula sa kanilang lupain upang gamitin ng Bureau of Immigration (BI).

Nauna nang pinayagan ni Catapang ang hiling ni Immigration Commissioner Joel Anthony Viado na patuloy na gamitin ng BI ang naturang pasilidad bilang lugar para sa mga dayuhang detainee na nasa ilalim ng deportation proceedings o naghihintay ng aktuwal na deportasyon.

Ayon kay Catapang, ang kooperasyong ito ay hindi lamang tumutugon sa agarang pangangailangan para sa lugar ng mga detainee, kundi tinitiyak din ang karapatang pantao at kapakanan ng mga dayuhan habang dinadaanan ang legal na proseso.

Binibigyang-diin din nito ang pagsisikap ng pamahalaan na pabilisin ang proseso ng deportasyon nang may makataong pagtrato sa mga sangkot.

Isa sa mga mahahalagang aspeto ng kasunduang ito, ayon kay Catapang, ay ang bagong sistema ng pamamahala sa mga dayuhang Persons Deprived of Liberty (PDLs). Sa halip na dalhin ang mga ito sa pangunahing opisina ng BI, direktang ililipat ng BuCor ang mga detainee sa MJTC Barracks.

Ang pagtutulungan ng BuCor at BI ay isang positibong hakbang tungo sa pagpapabuti ng sistema ng deportasyon sa bansa. Sa pagkakaroon ng dedikadong pasilidad at mas epektibong proseso, mas magiging handa ang dalawang ahensiya sa pagharap sa lumalaking bilang ng mga dayuhang kailangang i-deport.

Bilang magkatuwang sa ilalim ng Department of Justice, layon ng BuCor at BI na pabilisin ang proseso ng batas habang pinangangalagaan ang karapatan ng bawat indibidwal na apektado, dagdag ni Catapang.

Aniya pa, para sa mga dayuhang naghihintay ng deportasyon, ang inisyatibong ito ay maaaring magdulot ng pag-asa at katiwasayan, sa gitna ng mahirap na kalagayan.