Kinakarir sa Senado

ISINUSULONG ni Senadora Camille Villar ang isang panukalang batas na layong bigyan ng tatlong araw na bayad na leave kada taon ang mga empleyado sa pampubliko at pribadong sektor, partikular para sa pangangalaga sa kalusugang pangkaisipan.

Ayon sa panukalang inihain bago ang pagbubukas ng Ika-20 Kongreso, kinikilala nito ang lumalalang suliranin sa mental health sa mga lugar ng trabaho. Nilalayon ng panukala na magbigay ng nakatalagang pahinga para sa mga manggagawa upang tugunan ang stress, pagkapagod, o matinding pag-aalala—nang hindi kailangang magpakita ng medikal na sertipikasyon o mawalan ng kita.

Sa paliwanag ng panukala, isinaad ni Villar: “One of the objectives of the Mental Health Act is to develop and establish a comprehensive, integrated, effective, and efficient national mental health care system responsive to the psychiatric, neurologic, and psychosocial needs of the Filipino people.”

Binigyang-diin ni Villar na ang mental wellness leave ay hiwalay sa karaniwang sick leave o vacation leave, at mahalagang hakbang ito upang masiguro ang emosyonal at sikolohikal na kalusugan ng bawat manggagawa.

Kasabay nito, isinusulong din ng senadora ang isang hiwalay na panukala upang palawakin ang saklaw ng PhilHealth at isama ang buong benepisyong pakete para sa mental health disorders—mula sa preventive care hanggang sa clinical support—upang mas maging abot-kaya at naa-access ng mga Pilipino ang ganitong serbisyong pangkalusugan.

Matagal nang ipinapanawagan ng mga mental health advocate ang pagkakaroon ng mas makataong patakaran sa mga opisina, lalo na’t mas lumala ang epekto ng stress at depresyon sa panahon ng pandemya. Sa oras na maipasa, ang panukala ni Villar ay maglalagay sa Pilipinas sa hanay ng iilang bansa sa Asya na may nakahiwalay at bayad na mental health leave.

Sa huli, layunin ng panukalang ito na hindi lamang isulong ang pangangalaga sa sarili, kundi pati ang pag-alis ng stigma sa usapin ng mental health at ang ganap na pagsasama nito bilang bahagi ng mga programang pangkapakanan ng mga manggagawa.