MULING hinikayat ni Senador Alan Peter Cayetano ang paglikha ng isang hiwalay at espesyal na kagawaran ng pamahalaan na tututok sa pangangalaga at pagpapaunlad ng yamang-dagat ng bansa, gayundin sa kapakanan ng mga mangingisda.

Inihain ni Cayetano kamakailan lamang ang Senate Bill No. 417 na naglalayong itatag ang Department of Fisheries and Aquatic Resource (DFAR), na magiging bukod sa Department of Agriculture.

Binigyang-diin ng senador na sa kabila ng pagiging isa sa nangungunang prodyuser ng isda at halamang-tubig sa buong mundo, nananatiling kabilang sa pinakamahihirap na sektor sa Pilipinas ang mahigit 2.29 milyong rehistradong mangingisda.

Ipinahayag niya na ang lawak ng ating karagatan — umaabot sa mahigit 2.2 milyong kilometro kuwadrado — ay isang malaking yaman na dapat mapakinabangan. “The Philippines, being an archipelago with very rich marine resources, can be a marine powerhouse,” aniya.

Sa panukalang batas, nakasaad na ang DFAR ang magiging pangunahing ahensya sa lahat ng usaping may kinalaman sa pangingisda at yamang-dagat. Prayoridad nito ang pagtulong sa maliliit na mangingisda sa pamamagitan ng pagbibigay ng tulong pinansyal, pagsasanay, at proteksyon sa kanilang karapatan.

Iginiit ni Cayetano na ang kasalukuyang Department of Agriculture ay pangunahing nakatuon sa agrikulturang panlupa. “It is time for the government to provide a focused, single-minded, specialized department responsive to the needs and concerns of the fisheries and aquatic resource industry,” dagdag niya.

Layunin din ng DFAR na labanan ang illegal fishing gamit ang makabagong teknolohiya, paigtingin ang pagpapatupad ng mga batas, at makipagtulungan sa mga non-government organizations. Itinataguyod ng panukala ang mas aktibong pananaliksik para sa sustenableng aquaculture, pangangalaga ng marine biodiversity, at paggawa ng patakarang nakabatay sa datos.

Ipinaliwanag ni Cayetano na pag-iisahin sa ilalim ng DFAR ang mga tungkuling kasalukuyang nasa ilalim ng Bureau of Fisheries and Aquatic Resources (BFAR), Philippine Fisheries Development Authority (PFDA), at ilang programa ng Department of Environment and Natural Resources (DENR). Naniniwala siyang magbubunga ito ng mas episyenteng sistema at mas matatag na pagpapatupad.

Bilang panimulang pondo, iminumungkahi sa panukala ang ₱5 bilyon upang simulan ang operasyon ng DFAR — kabilang dito ang pagpapalakas ng produksyon sa pangingisda, pagprotekta sa mga endangered species, at pagsuporta sa kabuhayan ng mga mangingisda.

Nauna nang naghain si Cayetano ng katulad na panukala sa 17th, 18th, at 19th Congress. Ayon sa kanya, “This latest push reflects the urgent need for institutional reform in the fisheries sector.” Dagdag pa niya, “This measure would be a significant step in order to better protect, utilize, maximize, and conserve the nation’s marine resources as well as uphold the best interest of the fisherfolk.”

Kapag naisabatas, inaasahang magiging makabuluhan ang kontribusyon ng DFAR sa pagsusulong ng pangmatagalang pangangalaga ng karagatan, seguridad sa pagkain, at mas matibay na kabuhayan sa mga pamayanang baybayin sa buong bansa.