TATAAS muli ng P1.40 kada litro ang presyo ng diesel, 40 sentimos kada litro ng gasolina at 70 sentimos ang kerosina simula sa Martes ng alas-6:01 ng umaga.

Ito ang anunsyo ng Petron Corporation, Seaoil Philippines, Pilipinas Shell at Chevron Corporation.

Nag-anunsyo na rin ang PTT Philippines, Total Philippines, Petro Gazz at Unioil ng kahalintulad na price adjustment habang alas-4:01 ng hapon ang simula ng pagtaas ng presyo ng mga produkto ng Clean Fuel.

Sinabi ni PTT Media Relation Officer Jay Julian na maagang nag-anunsiyo ang Department of Energy-Oil Industry Management Bureau (DOE-OIMB) ng panibagong dagdag-presyo sa produktong petrolyo bunga ng paghina ng halaga ng piso at ang napipintong pagpapataw ng taripa ng Estados Unidos sa maraming bansa.