INIHAYAG ng Bureau of Corrections na ang sakit sa puso, partikular ang myocardial infarction o atake sa puso, ang nangungunang sanhi ng pagkamatay ng mga persons deprived of liberty (PDLs), na nalalampasan pa ang tuberculosis na matagal nang itinuturing na malaking banta sa kalusugan sa loob ng bilangguan.

Batay sa ulat na isinumite kay Bucor Director General Gregorio Pio P. Catapang Jr. ni CT/CSupt. Ma. Cecilia V. Villanueva, Direktor para sa Health and Welfare Services, habang nananatiling malaking suliranin ang TB sa lahat ng Operating Prison and Penal Farms (OPPFs) dahil sa mga salik tulad ng siksikan at hindi magandang bentilasyon, ipinapakita ng kasalukuyang datos na mas laganap na sanhi ng kamatayan ang ibang sakit sa respiratory system tulad ng pneumonia at acute respiratory failure.

Ani Villanueva, patuloy na aktibong pinangangasiwaan ng BuCor ang tuberculosis sa pamamagitan ng mga maayos na programa at serbisyo, na isinasagawa nang malapit kasama ang iba’t ibang ahensya ng gobyerno at non-government organizations. Layunin ng mga inisyatibang ito hindi lamang gamutin kundi pigilan din ang pagkalat ng TB sa mga pasilidad ng BuCor.

Isang mahalagang tagumpay sa laban ng BuCor kontra-TB, diin ni Villanueva, ang tuloy-tuloy na pagpapatupad ng Active Case Finding, na kinilala ng Muntinlupa City Health Office bilang nangungunang kontribyutor sa TB case finding at notification noong taong 2023.

Patuloy na isinasagawa ng BuCor ang mga programang may kinalaman sa TB gaya ng:

Screening para sa TB sa lahat ng bagong pasok na PDL sa Reception and Diagnostic Centers (RDC)

Regular na mass screening o active case finding para sa TB

Sesyon ng health education tungkol sa pag-iwas at pangangasiwa ng TB

Pagbibigay ng mga gamot laban sa TB, bitamina, at iba pang nutritional supplements

Pagmomonitor sa pagkain bilang suporta sa kalusugan ng immune system

Buwanang pagpupulong kasama ang Bantay Kalusugan para sa mga update at monitoring ng mga PDL na may TB sa kani-kanilang brigade

Routine Provider-Initiated Counseling and Testing (PICT) para sa mga nakarehistrong pasyenteng may TB

Regular na pagpupulong ng Tuberculosis Treatment Unit (TBTU)

Taunang Program Implementation Review (PIR) sa ilalim ng National Tuberculosis Program (NTP)

Regular na pagsasanay mula sa DOH para sa mga tauhan ng TBTU

Pagkakaroon ng TB Laboratory

Pinatutunayan ng mga pagsisikap na ito ang matibay na pangako ng BuCor sa pagkontrol, pamamahala, at tuluyang pagbawas ng kaso ng tuberculosis sa lahat ng kanilang pasilidad.

Batay sa datos, narito ang nangungunang 10 sanhi ng pagkamatay ng mga PDL mula 2022 hanggang 2025 sa New Bilibid Prison:

Acute Myocardial Infarction (Atake sa puso) – 445

Pneumonia – 234

Acute Respiratory Failure – 71

Cerebro Vascular Accident (Stroke) – 65

Chronic Kidney Disease – 61

Pulmonary Tuberculosis – 59

Electrolyte Imbalance – 43

Sepsis – 40

Congestive Heart Failure – 35

Anemia – 19