ITINANGGI ni Bulacan Rep. Salvador “Ador” Pleyto Sr. na tumanggap siya ng anumang “remittances” mula sa mga kontratistang umano’y konektado sa Discayas, at iginiit niyang hindi siya nasangkot sa anumang kuwestiyonableng transaksyon. Handang-handa rin umano siyang makipagtulungan nang lubos sa mga imbestigador upang linisin ang kanyang pangalan.

“Mahigpit kong kinokondena ang mga paratang at mga parinig na ito laban sa akin,” ayon kay Pleyto sa isang opisyal na pahayag.

“Napag-alaman kong sa isang kamakailang panayam kay Ombudsman Jesus Crispin Remulla, binanggit niya ang isang ulat ng Anti-Money Laundering Council (AMLC) na umano’y nag-uugnay sa aking pangalan bilang isa sa mga indibidwal na tumanggap ng ‘remittances’ mula sa Discayas bago pa ako mahalal bilang kongresista,” ani Pleyto.

Kasabay nito, sinabi ni Pleyto na pormal siyang humiling sa AMLC na bigyan siya ng kopya ng naturang ulat “o anumang kaugnay na dokumento” kung saan binanggit ang kanyang pangalan, “upang maharap ko nang maayos at responsable ang anumang pahayag o paratang na nakapaloob dito.”

Binigyang-diin ni Pleyto na ang transparency at due process ay masusunod lamang kung mabibigyan siya ng kumpletong impormasyon ng mga kinauukulang ahensya, upang makasagot siya sa mga paratang “batay sa mga katotohanan at dokumento, hindi sa mga haka-haka.”

“Para sa kapakanan ng transparency, handa akong makipagtulungan sa AMLC o anumang awtoridad upang matiyak na lalabas ang katotohanan at malinisan ko ang aking pangalan,” pahayag pa niya.

Nanawagan din ang mambabatas ng Bulacan sa publiko na huwag munang humusga hangga’t hindi pa nailalabas ang opisyal na kopya ng ulat ng AMLC, at nagbabala laban sa pagpapakalat ng hindi beripikadong impormasyon na maaaring makasira ng reputasyon.

“Hangga’t wala pa akong opisyal na kopya ng ulat mula sa AMLC, hinihiling ko sa publiko na huwag munang gumawa ng konklusyon o magpakalat ng mga impormasyong walang beripikasyon na maaaring makapinsala sa aking personal na dangal bilang pribadong indibidwal at bilang lingkod-bayan,” sabi ni Pleyto.

Ang pahayag ni Pleyto ay kasunod ng pagsisiwalat ni Ombudsman Remulla na ang isang ulat ng AMLC ay umano’y nagtukoy ng ilang “remittances” na kinasasangkutan ng ilang personalidad na konektado sa mga kompanyang may ugnayan sa kontrobersyal na Discaya construction group.

Muling tiniyak ng beteranong mambabatas ang kanyang paninindigan sa katotohanan, pananagutan, at mabuting pamamahala, at nangakong makikipagtulungan sa imbestigasyon “upang matiyak na mananaig ang hustisya at katarungan.”