KUALA LUMPUR, Malaysia – Ibinabatay ng International Criminal Court (ICC) ang mga desisyon nito sa Rome Statute at hindi sa political statements, sinabi ni Presidential Communications Office (PCO) Undersecretary Claire Castro.

Ito ang kanyang pahayag noong Linggo bilang tugon sa kampo ni dating Pangulong Rodrigo R. Duterte na kamakailan ay gumamit ng mga pahayag ni Pangulong Ferdinand R. Marcos Jr. upang kuwestyunin ang hurisdiksyon ng ICC sa kanyang kasong crime against humanity.

“Sa ating pagkakaalam, the ICC will base its decision or order or resolution on the Rome Statute and it will not be guided by the political statements,” ani Castro sa press briefing sa sidelines ng 47th ASEAN Summit and Related Meetings sa Malaysia.

“Kung iyan po ay kanilang gagamitan ay depende na ito sa ICC kung papaano nila ito ie-evaluate,” dagdag pa niya.

Sa mga naunang pagsusumite ng kampo ni Duterte sa ICC, iginiit nila na Marcos “impliedly accepted, for jurisdictional reasons, that former President Duterte should not be tried at the […] Court,” na tumutukoy sa isang liham noong 2023 kay Pangalawang Pangulong Sara Duterte kung saan sinabing ang gobyerno “will not assist the ICC, in any way, or form.”

Pinagtibay ng mga hukom ng ICC Pre-Trial Chamber I noong Oktubre 23 ang hurisdiksyon ng hukuman sa kaso laban kay Duterte, na kasalukuyang nakakulong sa pasilidad ng ICC sa The Hague, Netherlands.

Ibinasura ng hukuman ang argumento ng depensa na hindi maaaring gamitin ng ICC ang hurisdiksyon nito sa kaso dahil ang imbestigasyon sa kampanya kontra droga sa Pilipinas ay pinahintulutan lamang noong Setyembre 2021, o dalawang taon matapos ang epektibong pag-alis ng bansa sa Rome Statute.

Pinagtibay ng mga hukom na walang probisyon sa Statute na nagtatakda ng limitasyon sa panahon kung kailan maaaring gamitin ng ICC ang hurisdiksyon nito sa mga krimeng ginawa habang ang isang estado ay kasapi pa ng Statute. Philippine News Agency