TIMBOG ang 17 miyembro ng “Spaghetti Gang” na sangkot sa malawakang pagnanakaw ng mga kable ng telecommunications company, Biyernes ng madaling araw sa Las Piñas City.

Nasa aktong ikinakarga na ng mga suspek ang mga ninenok na malalaking kable sa nakaparadang Isuzu closed van sa harap ng malaking botika sa Alabang-Zapote Road, Barangay Talon Uno, nang dakpin sila ng mga tauhan ni Las Piñas Police Chief P/Col. Sandro Jay Tafalla dakong alas-3:35 ng madaling araw.

Ayon sa pulisya, isinagawa ang pagdakip nang mag-report sa kanila ang roving security personnel ng kompanyang may-ari ng mga kable hinggil sa ginagawang ilegal na aktibidad ng mga suspek.

Nakumpiska sa mga suspek na itinago sa mga alyas na “John,” “Patrick,” “Joshua,” “Johnrey,” “Dennis,” “Dupper,” “Bamber,” “Rommel,” “Rafael,” “Arman,” “Ryan,” “Jhon,” “Ariel,” “Peter,” “Rolando,” “Kian” at “Jeffrey” ang mga ninenok na makakapal na kableng may habang 150 metro na nagkakahalagang P556,929.72, isang dilaw na bolt cutter, tatlong improvised steel hooks at ang gamit nilang sasakyan.

Kinumpirma ni alyas “Vicente,” senior asset protection specialist ng telecoms company, na pag-aari nila ang mga pinutol na kable na nakalatag sa ilalim ng lupa sa Alabang-Zapote Road.

Pinapurihan naman ni Southern Police District (SPD) Director P/BGen. Randy Arceo ang mabilis na aksiyon ng Las Piñas Police, kasabay ng babala sa mga gagawa pa ng kahalintulad na krimen na haharapin nila ang mabigat na parusa.