NOONG Miyerkules, bumoto ang House Committee on Justice upang ibasura ang dalawang impeachment complaint na inihain laban kay Pangulong Ferdinand “Bongbong” R. Marcos Jr. kaugnay ng umano’y mga paglabag sa Konstitusyon.

Matapos ang tatlong araw na sunod-sunod at mahahabang deliberasyon, napagpasyahan ng komite na ang mga reklamo ay “kulang sa substansiya.”

Ang unang reklamo ay inihain ng abogadong si Andre de Jesus, habang ang ikalawa ay isinampa ng Makabayan bloc na pinamumunuan ng dating kinatawan ng Gabriela na si Liza Maza.

Bumoto ang komite ng 42–1, na may tatlong nag-abstain, upang aprobahan ang mosyon na ideklarang kulang sa substansiya ang reklamo ni De Jesus.

Pagkatapos nito, naghain ng mosyon si Deputy Minority Leader at Caloocan Rep. Edgar Erice na ideklarang sapat sa substansiya ang reklamo ng Makabayan.

Natalo ang mosyon ni Erice sa botong pito pabor laban sa tatlumpu’t siyam, na walang abstention.

Bago ang botohan, ipinaalala ni panel chairperson Gerville Luistro ng Batangas sa mga miyembro ng komite ang “napakabigat na responsibilidad” ng kanilang gawain.

Ayon sa kanya, ang tungkuling ito ay nangangailangan na gamitin ng bawat miyembro ang kanyang “mahusay na pagpapasya, sariling pagsusuri sa mga katotohanan, alegasyon, at mga kalakip” ng dalawang impeachment petition.

“Hindi lang ito usapin ng legalidad. Ito ay usapin ding politikal at moral. Let us vote not out of convenience, let us vote with your conscience,” ani Luistro.

“Isipin natin ang kapakanan ng bawat Filipino. Let us prove that in this hall, the interest of the Filipino people comes first,” dagdag niya.

Ipinaliwanag din niya na bilang namumunong opisyal ng tatlong araw na pagdinig, sinadya niyang maging liberal “upang mabigyan ng pagkakataon ang pagpapahayag ng lahat ng pananaw para sa mas malinaw at mas malawak na perspektiba” ukol sa mga reklamo.

Dagdag pa niya, ang mga deliberasyon ay naging “malawak at masinsinan.”