NAHULI ng National Bureau of Investigation–Naga District Office (NBI-NADO) ang isang suspek na nagpapanggap umano bilang kura paroko sa isang online scheme na idinisenyo upang makahingi ng mga donasyon mula sa mga nagiging biktima nito.

Inilunsad ang imbestigasyon kasunod ng reklamo ng isang miyembro ng klero na ang pangalan at larawan ay ginamit upang linlangin ang mga kakilala sa pagpapadala ng mga pondo.

Bilang tugon, agad nag-organisa ang mga ahente ng NBI-NADO ng isang strategic entrapment operation.

Ang suspek ay kaagad na inaresto matapos i-claim ang iligal na nakuhang pera sa pamamagitan ng isang mobile wallet account na naka-link sa scam.

Sa operasyon, narekober ng mga ahente ng NBI ang marked money at isang mobile device na pinaniniwalaang ginamit sa pagsasagawa ng panloloko.

Ang suspek ay kasalukuyang nahaharap sa mga kasong identity theft sa ilalim ng Cybercrime Prevention Act of 2012 at estafa sa ilalim ng Revised Penal Code.

“Hindi namin hahayaang samantalahin ng mga kriminal ang tiwala at mabuting kalooban ng publiko sa pamamagitan ng mga pekeng online na pagkakakilanlan,” ani Angelito DLP Magno, NBI acting director.

Hinihimok ng NBI ang publiko na mag-ingat at mag-verify muna sa mga tulong pinansyal na hinihingi online, at iulat kaagad ang mga kahina-hinalang social media account o aktibidad sa mga awtoridad.