INAPRUBAHAN ng House Committee on Population and Family Relations ang isang substitute bill na mag-a-update sa civil registry system ng bansa, isang hakbang na nakikitang tutugon sa matagal nang mga kakulangan sa pagpaparehistro ng kapanganakan at kamatayan na nakaaapekto sa milyun-milyong Pilipino.

Pinagsama-sama ng komite ang mahigit 29 panukala, kabilang ang House Bill (HB) No. 5213 na pangunahing inakda ni Leyte 1st District Rep. Ferdinand Martin Romualdez, kasama ang mga kinatawan ng TINGOG Party-list na sina Yedda Marie Romualdez, Andrew Julian Romualdez at Jude Acidre.

Layunin ng panukalang Philippine Civil Registry Act na amyendahan ang Republic Act No. 3753, isang batas noong 1930 na namamahala sa pagpaparehistro ng mahahalagang pangyayari tulad ng kapanganakan, kasal at kamatayan.

Ipinapakilala ng substitute bill ang mga reporma upang mapadali ang huli at naantalang pagpaparehistro, mapalakas ang pagbabahagi ng datos sa pagitan ng mga ahensya, at maisulong ang digitalisasyon ng mga proseso sa civil registry, lalo na upang mapabuti ang access sa mga geographically isolated at disadvantaged na lugar.

Bahagi ang panukala ng prayoridad na agenda ng Legislative-Executive Development Advisory Council (LEDAC) ni Pangulong Ferdinand Marcos Jr.

Ayon kay TINGOG Rep. Jude Acidre, vice chairperson ng House Committee on Population and Family Relations, ang pag-apruba ay isang hakbang tungo sa pagsasara ng matagal nang kakulangan sa civil registration.

“Para sa maraming Pilipino, ang hamon ay hindi lamang access sa mga serbisyo, kundi access sa pagkilala,” ani Acidre.

Binanggit niya na ang hindi kumpleto at naantalang pagpaparehistro ay patuloy na naglilimita sa access sa edukasyon, serbisyong pangkalusugan at social protection, lalo na sa mga komunidad na kulang sa serbisyo.

“Dito dapat magtagpo ang polisiya at aktuwal na karanasan ng mamamayan. Hindi lang natin ina-update ang isang batas—inaayos natin ang isang sistemang matagal nang nag-iwan sa ilang Pilipino na hindi nakikita at hindi napaglilingkuran nang maayos,” aniya.

Binigyang-diin ni Acidre na ang isang maaasahang civil registry system ay mahalaga sa pagpapabuti ng pamamahala at paghahatid ng serbisyo.

“Nagsisimula ang mabuting polisiya sa mahusay na datos, at nagsisimula ang mahusay na datos sa kumpleto at tumpak na pagpaparehistro. Kung nais nating maging epektibo ang pagtugon ng pamahalaan, dapat nating tiyakin na walang Pilipinong maiiwan—na bawat Pilipino ay nabibilang at kinikilala,” aniya.

Ang panukalang inaprubahan ng komite ay isusumite para sa committee report at deliberasyon sa plenaryo.