ITINALAGA ni Pangulong Ferdinand “bongbong” R. Marcos Jr. si Dita Angara-Mathay bilang bagong kalihim ng Department of Tourism, ayon sa anunsyo ng Presidential Communications Office (PCO) nitong Biyernes, April 10.

Ayon sa PCO, layunin ng naturang appointment na palakasin ang papel ng turismo hindi lamang bilang pagpapakita ng kultura kundi bilang mahalagang sektor para sa trabaho, negosyo, at pag-unlad ng iba’t ibang rehiyon.

“Ipinapakita ng kanyang pagtatalaga ang layunin ng administrasyon na itaguyod ang turismo hindi lamang bilang pagpapakita ng kultura, kundi bilang isang malakas na tagapaglikha ng trabaho, negosyo, at kaunlarang panrehiyon,” ayon sa PCO.

Si Angara-Mathay ay bihasang lingkod-bayan na may ilang dekadang karanasan sa kalakalan, pamumuhunan, at ugnayang pang-ekonomiya sa pandaigdigang antas.

Bago ang kanyang pagtatalaga, nagsilbi si Angara-Mathay bilang Commercial Counselor sa Philippine Trade and Investment Center sa Tokyo, kung saan pinangunahan niya ang mga estratehikong pakikipagtulungan sa mga industriya ng Japan—isa sa mga pangunahing pinagmumulan ng pamumuhunan, teknolohiya, at turismo para sa Pilipinas.

Sa kabuuan ng kanyang karera, pinamunuan ni Angara-Mathay ang mga programang nag-uugnay ng pandaigdigang pakikipagsosyo sa mga kongkretong resulta sa lokal na antas, na sumusuporta sa pagpapaunlad ng mga negosyo, pagpapalakas ng mga industriya, at pagpapalawak ng mga oportunidad para sa mga negosyong Pilipino, lalo na ang MSMEs.

Sa kanyang pagtatalaga, layunin ng administrasyon na higit pang iayon ang turismo sa paglago ng ekonomiya sa pamamagitan ng pag-akit ng mas maraming pamumuhunan, pagsuporta sa mga lokal na industriya, at pagtiyak na ang benepisyo ng turismo ay maramdaman sa iba’t ibang rehiyon.

Pinalitan ni Angara-Mathay ang dating Kalihim ng Turismo na si Christina Frasco, na ngayon ay nagsisilbi bilang Presidential Adviser for Sustainable and Resilient Communities.