ALINSUNOD sa direktiba ni Pangulong Ferdinand Romualdez Marcos Jr. na panatilihin ang integridad at pananagutan sa serbisyo publiko, inanunsyo ng Bureau of Immigration (BI) ang agarang pagpapalabas at pagsasampa ng kaso laban sa isa nitong ahente na nasangkot sa operasyon ng entrapment sa Cebu.

Ayon sa ulat, ang 61-anyos na ahente ng BI ay naaresto ng mga operatiba ng Philippine National Police Regional Police Office 7 (PNP-RPO 7) noong gabi ng Mayo 5 sa loob ng isang kainan sa A.S. Fortuna Street, Mandaue City.

Nag-ugat ang operasyon sa reklamo ng isang 43-anyos na Korean national na nagsabing hinihingan siya ng proteksiyon na pera ng naturang ahente.

Sa isinagawang entrapment operation, nagsilbing poseur-victim ang nagrereklamo at iniabot ang markadong pera sa suspek. Matapos tanggapin ng ahente ang salapi, agad siyang inaresto ng mga awtoridad dahil sa pangingikil.

Narekober mula sa suspek ang mga markadong pera na ginamit sa operasyon.

Kumpirmado ng BI na agad na inalis sa puwesto ang naturang ahente, at sinimulan na ang mga kasong administratibo laban sa kanya. Ang kanyang kaso ay inendorso na rin sa Civil Service Commission para sa tuluyang pagkakansela ng kanyang kontrata sa serbisyo.

Sa pahayag ni BI Commissioner Joel Anthony Viado, binigyang-diin niya na hindi kukunsintihin ng ahensya ang anumang uri ng maling gawain sa kanilang hanay.

“Hindi namin hahayaan na isang tiwaling empleyado ang makasira sa integridad ng Bureau. Ipinapakita ng insidenteng ito na nagsusumikap ang mga ahensya ng pamahalaan na pigilan ang mga indibidwal na inaabuso ang kanilang kapangyarihan,” ani Viado. “Sisiguraduhin naming maipagkakaloob ang hustisya, at agad na aalisin ang mga nang-aabuso.”