IPINASA ng Bureau of Customs–Ninoy Aquino International Airport (BOC-NAIA) sa Philippine Drug Enforcement Agency (PDEA) ang walong parsela na nasabat na naglalaman ng pinaghihinalaang marijuana o “kush” na may tinatayang halagang ₱5.11 milyon noong Mayo 11, 2026.

Ang hakbang na ito ay alinsunod sa direktiba ni Pangulong Ferdinand R. Marcos Jr. na palakasin ang kampanya ng pamahalaan laban sa ilegal na droga habang pinatitibay ang seguridad sa hangganan at pagpapatupad ng batas sa kalakalan.

Ang mga parsela, na dumating mula sa iba’t ibang lokasyon sa Estados Unidos noong Nobyembre hanggang Disyembre 2025, ay na-flag ng mga tauhan ng Central Mail Exchange Center matapos magpakita ng palatandaan ng pagtatago at maling deklarasyon sa isinagawang pagsusuri at profiling.

Ang mga kargamento ay maling idineklara bilang karaniwang consumer items gaya ng desk calendars, wall calendars, mga libro, tracksuits, cotton shirts, at shorts. Kabilang sa mga parsela ang nakapangalan sa mga consignee sa Cavite, Laguna, at Misamis Oriental.

Sa isinagawang pisikal na pagsusuri, natuklasan ng mga awtoridad ang humigit-kumulang 3,407 gramo ng pinaghihinalaang marijuana kush na nakatago sa loob ng mga parsela. Ang mga nakumpiskang kontrabando ay may tinatayang halagang ₱5,110,500.

Pormal na ipinasa ang mga parsela sa PDEA para sa chemical analysis, case build-up, at pagsasampa ng kaukulang kaso sa ilalim ng Republic Act No. 9165 o Comprehensive Dangerous Drugs Act of 2002, kaugnay ng Customs Modernization and Tariff Act (CMTA).

Ang operasyon ay patunay ng patuloy na pagbabantay ng Bureau laban sa paggamit ng international mail at cargo channels para sa ilegal na pag-angkat ng ipinagbabawal na gamot.

Sa pamumuno ni Commissioner Ariel F. Nepomuceno at District Collector Atty. Yasmin Obillos-Mapa, muling pinagtibay ng BOC-NAIA ang kanilang pangako na palakasin ang operasyon kontra ilegal na droga at paigtingin ang pagpapatupad ng customs enforcement bilang suporta sa direktiba ng administrasyon upang matiyak ang ligtas na hangganan, makatarungang kalakalan, at kaligtasan ng publiko.