SANTA ROSA, Laguna — Magtatapat ang mga umaangat na amateur boxer na sina Jervis Llonor ng PAMBUNO Team-Cabuyao Fitness Gym at Justine Acupar ng Laguna Fighters Team sa dibisyong 49.50-kilogram sa “Laguna Underground Battle: Boxing Event” sa Mayo 23, 2026 sa St. Francis Homes Village sa Barangay Pooc dito.

Ang naturang boxing event ay inorganisa ng South Combat Club and Fitness Center at inaasahang tampok dito ang ilang lokal na mandirigma mula sa iba’t ibang gym sa Laguna at mga karatig-lugar.

Sasabak si Llonor sa laban sa ilalim ng paggabay nina coaches Adolfo Ibayan, Jhun Riel Taruc Ramonal, at Alain Paul Cabodil bilang kinatawan ng PAMBUNO Team-Cabuyao Fitness Gym.

Samantala, pangungunahan naman ni Acupar ang Laguna Fighters Team sa inaasahang maigting na sagupaan sa light flyweight category.

Ayon sa mga organizer, layunin ng event na maipakita ang husay ng mga grassroots boxer at mabigyan ng exposure at karanasan ang mga aspiring fighter sa loob ng ring.

Inaasahan namang dadagsa ang mga boxing enthusiast para masaksihan ang underground boxing spectacle na nagpapakita ng lumalaking combat sports scene sa Laguna.