ITINANGGI ni Senador Robinhood Padilla ang mga alegasyon na tinulungan niya si Senador Ronald “Bato” dela Rosa na makaiwas sa pag-aresto, at sinabing umalis sila sa Senado nang walang humarang sa kanila at walang local arrest warrant na ipinakita.

Ayon sa press release mula sa tanggapan ni Padilla, sinabi ng senador na walang pagtatangkang umiwas sa mga awtoridad nang umalis sila ni dela Rosa sa Senado bago magbukang-liwayway matapos ang insidente noong Mayo 13.

“Paano kami tatakas? Ang daming pulis sa loob at labas ng Senado, may CCTV pa. Wala namang humarang sa amin,” sabi ni Padilla.

Sinabi ni Padilla na nanatili siya sa Senado nang tatlong araw upang samahan si dela Rosa matapos itong bumalik para dumalo sa session kasunod ng anim na buwang pagliban.

Ayon sa kanya, nag-iba ang atmospera sa Senado habang kumakalat ang mga usap-usapan tungkol sa posibleng pagbabago sa liderato at inaasahang pagdating ng articles of impeachment laban kay Vice President Sara Duterte.

“Ramdam mo na iba na ang ambience. May mga armadong kalalakihan na sa labas. May mga rally, may mga usapang lalala ang sitwasyon,” sabi ni Padilla.

Sinabi ni Padilla na lalo pang tumaas ang tensyon nang ipaalam sa kanila na may mga putok ng baril sa ibabang bahagi ng Senate building. Ayon sa kanya, nasa kanilang opisina sila ni dela Rosa sa ikalimang palapag nang mangyari iyon.

“May mga senador na natakot talaga. Madilim, walang ilaw, tense ang sitwasyon. May mga umiiyak na. Kaya bumaba ako para tingnan kung ayos lang ang lahat,” aniya.

Sinabi ni Padilla na iniisip ni dela Rosa ang kaligtasan ng mga senador, media workers at mga taong nasa paligid ng Senado, hindi lamang ang sarili nito.

“Nakita ko kay Sen. Bato na iniisip niya kung paano madi-diffuse ang sitwasyon. Pulis kasi ang puso niyan,” dagdag niya.

Sinabi rin ni Padilla na nakausap ni dela Rosa si Interior Secretary Jonvic Remulla at PNP Chief General Jose Melencio C. Nartatez nang dumating ang mga ito sa Senado.

“Sabi ni Secretary Jonvic, ‘Hindi ako nandito para arestuhin ka pare, nandito ako para i-secure ang lugar.’ Magaan ang usapan, walang tensiyon,” sabi ni Padilla.

Ayon kay Padilla, walang ipinakitang warrant of arrest mula sa local court ang NBI o PNP.

“Wala namang warrant. Ayon mismo sa Senate President, wala ring local warrant. Kaya very relaxed kami,” aniya.

Sinabi ni Padilla na kalaunan ay sinabi niya kay dela Rosa na kailangan na niyang umuwi dahil hinahanap na siya ng kanyang asawa. Ayon sa kanya, nakisabay si dela Rosa dahil wala itong sasakyan sa Senado.

“Ang sabi ni Sen. Bato, ‘Sasabay na ko.’ Alangan namang tanggihan ko yun? Walang sasakyan si Sen. Bato dahil inihatid lang sya sa Senado ng sasakyan ni Senador Alan Peter Cayetano,” sabi ni Padilla.

Sinabi ni Padilla na bumaba si dela Rosa sa Makati, kung saan sinundo ito ng sarili niyang sasakyan. Aniya, hindi na niya tinanong kung saan pupunta si dela Rosa pagkatapos.

Tinanggihan din ni Padilla ang pagtawag kay dela Rosa bilang fugitive, at sinabing dapat igalang ang sariling proseso ng bansa.

“Para sa akin, hindi siya fugitive. Hindi ko matanggap na basta na lang natin tatawaging ganoon dahil sinabi ng dayuhan. Kailangan din nating igalang ang sarili nating proseso bilang bansa,” sabi ni Padilla.

Nanawagan din si Padilla sa publiko na huwag hayaang matabunan ng sigalot sa pulitika ang iba pang isyung nararanasan ng mga Pilipino.

“Ang dami pa nating dapat pag-usapan — trabaho, tamang sweldo, aksyon laban sa korapsyon. Kung gusto nating linisin ang gobyerno, dapat lahat. Huwag tayong mamili,” aniya.

Lumabas ang salaysay ni Padilla habang patuloy ang panawagan ng ilang senador at opisyal na repasuhin nang buo ang CCTV footage, security decisions at koordinasyon sa law enforcement noong insidente noong Mayo 13.

Nagbunsod ang insidente ng mga tanong tungkol sa seguridad ng Senado at mga pangyayaring may kinalaman sa pananatili ni dela Rosa sa Senado sa gitna ng mga ulat tungkol sa International Criminal Court arrest warrant.