SUPORTADO ni dating Senate President Vicente “Tito” Sotto III ang minority bloc ng Senado na itulak para maging Senate president si Sen. Sherwin Gatchalian.

Inilutang ang pangalan ni Gatchalian bilang posibleng piliin para sa pinakamataas na posisyon sa Senado habang nagpapatuloy ang mga usapan sa liderato ng kapulungan, ayon kay Sotto.

Walang ibinigay na timetable si Sotto ngunit hindi niya isinara ang posibilidad ng leadership move. Nang tanungin kung maaaring maging Senate president si Gatchalian sa lalong madaling panahon, sumagot siya ng: “It depends.”

Nagkaroon ng palitan ng mensahe matapos ang mga pahayag ng ilang senador tungkol sa posibleng leadership changes, kasunod ng pag-upo ni Senate President Alan Peter Cayetano at paglipat ni Sotto sa minority.

Nauna nang sinabi ni Sen. Panfilo “Ping” Lacson na suportado ng Senate minority bloc si Gatchalian bilang posibleng Senate president at inilarawan itong kwalipikado, handa at katanggap-tanggap sa ilang miyembro ng majority.

Sinabi na rin ni Gatchalian na handa siyang magsilbi kung hihilingin ng kanyang mga kasamahan na tanggapin niya ang Senate presidency at iboto siya para rito.

Anumang pagbabago sa liderato ay kailangang aksyunan ng mga senador sa plenaryo. Sa ngayon, si Cayetano pa rin ang Senate president at wala pang inanunsiyong panibagong reorganization ang Senado.

Naganap ang mga usapan sa liderato habang naghahanda ang Senado sa impeachment trial ni Vice President Sara Duterte.