HINDI bababa sa dalawang katao ang kumpirmadong nasawi matapos gumuho ang isang gusali sa Angeles City noong Linggo ng umaga, habang patuloy na nakikipaglaban sa oras ang mga rescuer upang mailigtas ang mga pinaniniwalaang na-trap sa ilalim ng mga guho ng estrukturang bumagsak kasabay ng malakas na ulan.

Iniulat ng Angeles City Disaster Risk Reduction and Management Office na may 26 pang indibidwal ang nailigtas habang 18 pa ang nawawala hanggang sa oras ng pag-uulat.

Ang ikalawang nasawi—isang lalaki—ay nahugot mula sa mga guho pasado hatinggabi ng Linggo. Sinubukan siyang i-resuscitate ng mga rescuer ngunit idineklarang dead on arrival sa kalapit na ospital.

Ang unang nasawi, na inilarawang isang Malaysian citizen na na-trap sa isang apartelle katabi ng gumuhong gusali, ay narekober noong Linggo ng hapon.

Iniutos ni Philippine National Police chief, General Jose Melencio C. Nartatez Jr., sa lokal na pulisya na ganap na tumulong sa nagpapatuloy na imbestigasyon sa insidente at tukuyin ang mga kasong isasampa laban sa mga may-ari at nagtayo ng estruktura.

“Sinusuportahan din ng PNP ang nagpapatuloy na imbestigasyon upang matukoy ang sanhi ng insidente at posibleng paglabag sa safety at building regulations,” ayon sa hepe ng PNP.

“Patuloy ang rescue operations sa kabila ng mapanganib na kondisyon dulot ng hindi matatag na mga guho at live power lines,” dagdag niya.

Nagdeploy naman si Police Regional Office 3 director Brigadier Gen. Jess B. Mendez ng 175 pulis upang tumulong sa Bureau of Fire Protection, Armed Forces of the Philippines, at Angeles City DRRMO sa search, rescue, retrieval operations, traffic management, at seguridad sa lugar.

Pinayuhan din ng PRO3 ang publiko na iwasan ang lugar upang hindi maantala ang emergency operations.

Sa isang pahayag, sinabi ni Gen. Nartatez na mahigpit silang nakikipag-ugnayan sa lokal na pamahalaan at emergency response units matapos ang pagbagsak ng hotel construction site sa Barangay Balibago, Angeles City, Pampanga.

“Patuloy ang rescue operations sa kabila ng mapanganib na kondisyon dulot ng hindi matatag na debris at live power lines. Sinusuportahan din ng PNP ang nagpapatuloy na imbestigasyon upang matukoy ang sanhi ng insidente at posibleng paglabag sa safety at building regulations,” aniya.

Hindi bababa sa 26 katao ang nakaligtas sa pagguho ng siyam na palapag na konkretong gusali.

Patuloy na iniimbestigahan ang sanhi ng pagguho. Kinukuha na rin ng pulisya ang pahayag ng construction foreman at kanyang mga tauhan na nakalabas ng gusali bago ito tuluyang bumagsak.