PARA kay Tingog Party List Rep. Jude Acidre, walang “online voting” para sa mga absent na senador kaugnay sa gagawing paglilitis ng Senado para sa impeachment case ni Vice President Sara Duterte.

Kailangan “physically present” ang mga senador, pagbibigay diin ni Acidre, na tatayong mga senator-judges sa nakatakdang paglilitis.

Inilabas ni Acidre, Chairman ng House Committee on Higher and Technical Education, ang pahayag na ito habang nagtatalo ang mga senador sa panukalang payagan ang remote participation sa pamamagitan ng online sa mga proseso ng Senado.

Lalo pang uminit ang debateng ito, ayon pa kay Acidre, matapos ibasura ng Korte Suprema ang hiling ni Sen. Ronald “Bato” Dela Rosa na harangan ang kanyang pag-aresto kaugnay ng warrant mula sa International Criminal Court (ICC) na may kinalaman sa madugo at marahas na war on drugs drug campaign ni dating Pangulong Rodrigo Duterte.

“Ang mas kritikal na antas ng paglahok ay ang pagboto. Kahit sa Kamara, hindi talaga hinihikayat ang pagboto online.

Sa katunayan, kailangan mong pisikal na naroroon ayon sa mga alituntunin upang makaboto sa anumang panukala. Mas lalo na pagdating sa impeachment ng Pangalawang Pangulo,” pagbibigay-diin ni Acidre.

Para sa kongresista, ang pisikal na pagdalo ay hindi lamang isang pormalidad sa batas dahil kailangang marinig, makita, at timbangin ng mga senador-hudisyal ang mga testimonya sa isang proseso kung saan ang kredibilidad, tono at kilos ay kasing halaga ng mga dokumentong inihain sa korte.

Naging mabusisi ang pagsusuri sa hirit na remote participation dahil nananatiling paksa ng arrest warrant si Dela Rosa.

Ayon sa mga awtoridad, intensyon nilang ipatupad ito, at may mga ulat na nagsabing panandalian siyang nagpakita sa Senado bago muling nawala.

“Kung gagawin man ito, tiyak na hindi sa isang impeachment trial. Hindi ko akalain na isinaalang-alang kailanman ang posibilidad na iyan sa pagbalangkas ng mga alituntunin,” sabi ni Acidre.

Aminado ang mambabatas na binago ng teknolohiya ang paraan ng pagtatrabaho ng mga institusyon, ngunit iginiit niya na iba ang kategorya ng impeachment dahil ito ay isang konstitusyonal na paglilitis at hindi isang karaniwang pagboto sa batas.

“Siyempre, kailangan nating tanggapin na ang mas mataas na antas ng teknolohiya ay tila nagpabago sa paraan ng ating pagtatrabaho.

Ngunit para sa isang bagay na kasing bigat at kasing halaga ng impeachment ng ikalawang pinakamataas na opisyal ng bansa, sa tingin ko ay walang kapalit ang pisikal na pagdalo, lalo na sa panahon ng pagboto,” aniya.