SINABI ni House trial spokesperson at kinatawan ng Lanao del Sur na si Zia Alonto Adiong na ang umano’y mga kakulangan sa Statements of Assets, Liabilities and Net Worth (SALN) ni Vice President Sara Z. Duterte ay maaaring maging malaking usapin sa impeachment trial at posibleng humantong sa pagkakakumbikto na kahalintulad ng nangyari sa yumaong Chief Justice Renato Corona.

“Sa Corona impeachment proceedings, na-impeach si the late Chief Justice Corona simply because of his non-disclosure of his dollar accounts, di ba? Mayroon nang precedence na nangyari,” ani Adiong.

Nahahatulan si Corona ng Senate impeachment court noong 2012 dahil sa betrayal of public trust at culpable violation of the Constitution matapos mapatunayan ng mga prosecutors na hindi niya lubusang idineklara ang kanyang mga ari-arian, kabilang ang mga dollar account, sa kanyang SALN.

Iginiit ni Adiong na hindi maaaring magpatupad ng ibang pamantayan ang mga senador sa kaso ni Duterte kung dati nilang hinatulan si Corona dahil sa mga isyu ng hindi pagdedeklara.

“So if the Senate acted on that premise, on that legal basis, they cannot be selective also to apply the same appreciation this time with the Vice President not declaring her cash in hand or cash deposits from 2019 up to 2022,” aniya.

Iniuugnay sa Articles of Impeachment laban kay Duterte ang umano’y maling paggamit ng confidential funds, hindi maipaliwanag na yaman, panunuhol sa mga opisyal ng gobyerno, at pagbabanta kina Pangulong Ferdinand R. Marcos Jr., First Lady Liza Araneta-Marcos, at dating Speaker Ferdinand Martin G. Romualdez.

Sa mga pagdinig ng House Committee on Justice, kinuwestiyon ng mga mambabatas ang mga isinumiteng SALN ni Duterte, partikular ang kawalan ng deklarasyon ng cash on hand at cash in bank mula 2019 hanggang 2024 sa kabila ng malalaking transaksiyong pinansyal na nakita sa mga rekord ng Anti-Money Laundering Council (AMLC) na iniharap sa komite.

Sinuri rin ng justice panel ang umano’y hindi pagtutugma sa pagitan ng idineklarang net worth ni Duterte at ng mga transaksiyong pinansyal na makikita sa mga dokumento ng AMLC, na iniulat na may kinalaman sa bilyun-bilyong pisong covered at suspicious transactions na inuugnay kay Duterte at sa kanyang asawang si abogado Manases “Mans” Carpio.

Tinukoy ni Adiong ang aniya’y malinaw na hindi pagkakatugma sa mga SALN filing ni Duterte simula noong 2019.

“Very clear ‘yung doon sa cash in hand. Alam nila kung saan column nila i-reflect para i-submit nila ito. Pero all of a sudden in 2018, wala,” aniya.

“So do you want to tell me na nagkamali? Nagkamali ng isa pero it ran up to 2024. So the least that we can arrive at, assuming without conceding and giving them the benefit of the doubt, napaka-sloppy naman ito na trabaho ng staff mo,” dagdag niya.

Binanggit ng mambabatas na dati namang nagdedeklara si Duterte ng naturang mga entry noong siya ay alkalde pa ng Davao City, kaya mahirap umanong ipaliwanag ang kalaunang pagkawala ng mga ito.

“Before 2019, naglalagay sila sa SALN niya kasi Mayor siya, pero naglalagay sila doon sa SALN niya,” sabi ni Adiong.

“If you submitted your SALN completely while you were a mayor, how come when you became Vice President, all of a sudden something changed?”

Nakapagtipon na ang Senado bilang impeachment court at naglabas na rin ng writ of summons na nag-uutos kay Duterte na sagutin ang Articles of Impeachment, habang naghahanda naman ang House prosecutors para sa susunod na yugto ng paglilitis.