KINUWESTYON ni Senador Alan Peter Cayetano ang paghawak sa impormasyon kaugnay ng umano’y banta sa seguridad ng Senado, at sinabing anumang seryosong banta sa institusyon ay dapat ipaalam sa lahat ng senador at tugunan sa pamamagitan ng wastong security channels.

Sa isang pahayag, sinabi ni Cayetano na may ilang miyembro ng Senado na iniulat na nakatanggap ng impormasyon mula sa National Bureau of Investigation tungkol sa umano’y banta sa institusyon.

Sinabi niya na dapat seryosohin ang anumang tunay na banta laban sa Senado, ngunit kinuwestiyon niya kung bakit hindi agad naibahagi ang impormasyon sa lahat ng senador.

Inilabas ni Cayetano ang pahayag habang hinihigpitan ang seguridad sa Senado, pansamantalang ipinagbabawal ang mga bisita at ipinatutupad ang work-from-home arrangement para sa karamihan ng mga empleyado dahil sa iniulat na banta.

Sa ilalim ng heightened security measures, isinailalim sa mas mahigpit na screening at inspeksyon ang mga sasakyan, package, delivery at equipment na pumapasok sa Senado. Nagdagdag din ng security personnel at security posts, habang pinalakas ang perimeter security at surveillance operations.

Nananatiling hati ang Senado matapos ang June 3 session kung saan idineklara ng bagong mayorya na bakante ang mga posisyon sa liderato at inihalal si Senador Sherwin Gatchalian bilang Senate President Pro Tempore at Acting Senate President. Kinuwestiyon ni Cayetano ang legalidad ng hakbang.

Una nang sinabi ni Gatchalian na kailangan ang mga hakbang sa seguridad upang protektahan ang mga senador, empleyado, miyembro ng media, records at pasilidad ng Senado.

Sinabi rin niya na nakikipag-ugnayan ang Office of the Senate Sergeant-at-Arms sa law enforcement, intelligence, military at emergency-response agencies upang beripikahin ang iniulat na banta.

Iginiit ni Cayetano na dapat mabigyan ng sapat na impormasyon ang lahat ng senador kung seryoso ang banta at may epekto ito sa operasyon ng Senado.

Ipinatupad ang mga hakbang sa seguridad habang nagpapatuloy ang leadership dispute sa Senado at ang paghahanda para sa impeachment case laban kay Vice President Sara Duterte.