NATUKLASAN ng mga mananaliksik ang apat na bagong fault zone sa ilalim ng karagatan sa kanluran ng Luzon na pinaniniwalaang mga sangay ng Philippine Fault Zone (PFZ), isang pangunahing tectonic structure na may kaugnayan sa malalakas na lindol sa bansa.

Batay sa bagong pag-aaral, natukoy ang apat na fault zone gamit ang multichannel seismic reflection profiles at high-resolution bathymetric data. Ang mga ito ay may northwest-southeast (NW-SE) na direksyon at itinuturing na offshore extension ng Philippine Fault Zone sa Central Luzon.

Ayon sa mga mananaliksik, ang pinakatimog na fault branch ay maaaring direktang konektado sa pangunahing Philippine Fault Zone at umaabot hanggang sa Manila Trench, kung saan hinahati nito ang trench sa dalawang magkahiwalay na segment.

Ipinapakita rin ng pag-aaral na posibleng nabuo ang isang bagong transform fault na nag-uugnay sa hilaga at timog na bahagi ng Manila Trench.

Napag-alaman din na may malaking pagkakaiba sa lalim at anggulo ng paglusong ng tectonic slab sa ilalim ng Central Luzon. Ang hilagang bahagi ay lumulubog nang humigit-kumulang 40 degrees, habang ang timog na bahagi ay umaabot sa 80 degrees, indikasyon ng tinatawag na slab tearing o pagkakabiyak ng subducting plate.

Ayon sa pag-aaral, ang paghahati ng Manila subduction zone ay maaaring dulot ng banggaan ng Palawan microcontinental block at ng Philippine Mobile Belt, gayundin ng pag-usad ng Benham Rise.

Sinabi ng mga mananaliksik na ang mas malinaw na pag-unawa sa istruktura ng Philippine Fault Zone ay mahalaga upang mapahusay ang pagtataya sa mga seismic hazard at makatulong sa paghahanda laban sa malalakas na lindol sa Pilipinas. Ng Tonight Monitoring Team