Ang susunod na testigo mula sa National Bureau of Investigation (NBI) sa paglilitis sa impeachment ni Bise Presidente Sara Z. Duterte ay inaasahang magpapaliwanag kung bakit at paano inimbestigahan ng NBI ang mga napatunayang tunay (authenticated) na video ng umano’y pagbabanta, kabilang ang batayan ng kanilang mga naging konklusyon.

“Maibibigay lamang namin ang pangkalahatang larawan ng testimonya. Si Senior Agent Calilung ang naglatag ng pundasyon—napatunayan niyang tunay o authentic ang video recording.

Ngayon naman, si Atty. Jeremy Lotoc, na isang batikang imbestigador at abogado ng NBI, ang magpapaliwanag kung bakit at paano nila sinuri ang mga ebidensya, partikular ang mga video na ipinakita at pinatunayang authentic sa testimonya ni Senior Agent Calilung,” ani ni De Lima sa Saturday News Forum na ginanap sa Dapo Restaurant sa Quezon City.

Ayon kay De Lima, isa sa mga House prosecutors, si Senior Agent John Mark Calilung ang nagpatunay sa pagiging tunay ng mga video, habang si Atty. Jeremy Lotoc naman ang inaasahang magbibigay-linaw sa isinagawang imbestigasyon kaugnay ng mga ito.

“Kung gayon, ano ang naging kuwento roon? Ano ang naging resulta ng kanilang imbestigasyon?” tanong ni De Lima.

Sinimulan ng prosekusyon ang yugto ng paglalatag ng ebidensya para sa Article IV sa pamamagitan ng presentasyon ng testimonya ng NBI tungkol sa mga video na umano’y nagpapakita ng mga pahayag ng pagbabanta ni VP Duterte—isang mahalagang bahagi ng kasong impeachment na kasalukuyang dinidinig ng Senado.

“Dahil siya ang pinunong ahente ng pangkat na nagsiyasat sa mga pagbabanta. Siyempre, kasama rito ang mga video. Kaya ipaliliwanag niya kung bakit nila ito sinuri, ano ang naging resulta ng kanilang pagsusuri at mga imbestigasyon, pati na ang kanilang mga follow-up investigation. Binanggit na rin ni Senior Agent Calilung ang tungkol sa open-source investigation, at ito ay lalawakan pa ni Atty. Jeremy Lotoc,” paliwanag ni De Lima.

Sinabi rin niya na ang testimonya ni Lotoc ay hindi lamang magpapatibay sa naunang testimonya ni Calilung, kundi magdaragdag din ng mahahalagang detalye tungkol sa naging resulta ng imbestigasyon.

“Magbibigay siya ng corroboration at magdaragdag ng ilang aspeto sa testimonya ni Agent Calilung, lalo na tungkol sa mismong imbestigasyon, sa naging resulta nito, at sa batayan ng kanilang konklusyon kung bakit nila ito ini-refer o ipinasa sa Department of Justice (DOJ),” dagdag ni De Lima.

Ayon pa kay De Lima, inaasahang ipaliliwanag din ng testigo ng NBI ang naging konklusyon ng ahensya na ang insidente ay maaaring bumuo ng kasong grave threats at na may probable cause batay sa isinagawang imbestigasyon.

“May naging finding sila na ito ay grave threats at na may probable cause, batay sa antas ng pagsusuri ng mga imbestigador, para sa isang kasong grave threats. Kasama rin iyan sa kanyang testimonya,” ani De Lima.

Dagdag pa niya, tatalakayin din sa testimonya ang mga pangyayari, kundisyon, at bigat ng umano’y mga pagbabanta batay sa naging resulta ng imbestigasyon ng NBI.

“Ano ang mga pangyayari? Ano ang mga kundisyon? Gaano kaseryoso ang mga pagbabanta? Ano ang umiiral na konteksto ng mga pagbabanta batay sa resulta ng kanilang imbestigasyon?” pagtatapos ni De Lima.