UMABOT sa 91 panukala ang naging batas sa first regular session at special session noong Hunyo 17 ng 20th Congress, ayon sa performance report ng Senado.

Sakop ng ulat ang mga sesyon mula Hulyo 28, 2025 hanggang Hunyo 5, 2026, gayundin ang special session noong Hunyo 17.

Nakalista rin dito ang 22 panukalang inaprubahan ng Senado sa ikatlong pagbasa, tatlong inaprubahan sa ikalawang pagbasa at 20 nakabinbin sa ikalawang pagbasa.

Tatlong panukala ang naghihintay ng aksiyon ng Pangulo, habang tatlo ang nasa bicameral conference committee.

Ang mga panukalang nakatakda para sa aksiyon ng Pangulo ay tungkol sa mga paraan ng pagtuturo sa basic education curriculum, mga paaralan sa geographically isolated and disadvantaged areas at pagpapalawak ng access sa de-kalidad na tertiary education.

Nakabinbin pa sa bicameral conference committee ang panukalang Philippine Geriatric Center Act, ang hakbang na mag-iinstitutionalize sa Assistance to Individuals in Crisis Situations Program at ang Basic Education Voucher Program Act.

Kabilang sa mga panukalang inaprubahan ng Senado sa ikatlong pagbasa ang mga hakbang sa freedom of information, pagpapabilis ng pagpapatayo ng mga silid-aralan, kapasidad ng mga ospital, patas na pangongolekta ng utang, pangangalaga at suporta para sa mga taong may autism, paggamit ng body-worn cameras ng mga alagad ng batas at proteksiyon sa remittances ng mga overseas Filipino workers.

Iniulat din ng Senado na 62 resolusyon ang pinagtibay tungkol sa ratipikasyon ng mga kasunduan, mga tuntunin sa impeachment trial, usaping pandaigdig, tulong sa mga nasalanta at mga pagkilala.

Kabilang sa mga nananatiling nakabinbin sa ikalawang pagbasa ang mga panukala laban sa political dynasty, online sexual abuse at exploitation of children, ticket scalping at pang-aabuso sa mga pakyaw worker, gayundin ang mga hakbang sa party-list reform, procurement integrity at Philippine Coast Guard.

Ang mga bilang ay mula sa sariling ulat ng Senado at tumutukoy sa kalagayan ng mga panukala sa mga sesyong sakop nito.