IGINIIT ni private prosecutor Lorna Kapunan na nakakadagdag umano si Vice President Sara Z. Duterte sa tinatawag na “kultura ng karahasan” sa bansa dahil sa ilang pahayag na may kaugnayan sa pagbabanta at karahasan, sa halip na magsilbing halimbawa ng tamang pamumuno.

Ayon kay Kapunan, hindi niya sinasabing si Duterte lamang ang responsable sa problema, ngunit sinabi niyang may bahagi umano ang Bise Presidente sa paghubog ng pananaw ng publiko, lalo na ng mga kabataan.

“Hindi lang ang Bise Presidente ang sinasabi kong responsable. Ang sinasabi ko, nakakadagdag siya sa problema at hindi sa solusyon,” ani Kapunan sa isang online press briefing noong Miyerkules.

Ginawa ni Kapunan ang pahayag matapos ang insidente ng pamamaril sa Ateneo de Zamboanga University kung saan isang estudyante ang pumatay sa kapwa estudyante bago nagpakamatay.

Ayon kay Kapunan, dapat pagtuunan ng pansin ang mga pagpapahalagang nakikita ng kabataan mula sa kanilang paligid, kabilang ang mga mensahe at kilos ng mga lider ng bansa.

Binanggit niya ang ilang naging pahayag ni Duterte, kabilang ang kanyang pahayag noong Nobyembre 2024 tungkol sa umano’y pag-uutos niya na patayin sina Pangulong Ferdinand R. Marcos Jr., First Lady Liza Araneta-Marcos, at noo’y Speaker Martin Romualdez sakaling siya ay mapatay.

Naalala rin ni Kapunan ang naunang pahayag ng Bise Presidente na kukuha siya ng assassin na babayaran ng P5,000 kung magiging hindi tapat ang kanyang asawa.

“Kung ang isang mataas na opisyal, ang mismong Bise Presidente, ay nagsasabing may kilala siyang assassin na maaari niyang bayaran ng P5,000, ganoon na ba ang kultura natin? Isa ba tayong kultura ng karahasan?,” ani Kapunan.

Inihambing din ni Kapunan ang sitwasyon sa mga kontrobersiyang kinasasangkutan ng dating Pangulong Rodrigo Duterte, kabilang ang mga extrajudicial killings na iniuugnay sa kanyang kampanya kontra droga.

Ang dating pangulo ay nahaharap sa mga kasong may kaugnayan sa crimes against humanity sa International Criminal Court.

Samantala, nahaharap si Vice President Duterte sa impeachment complaint na may alegasyong betrayal of public trust kaugnay ng umano’y pagbabanta at mga hakbang na maaaring magdulot ng destabilisasyon.

Ayon kay Kapunan, mahalagang ipakita sa impeachment trial na hindi maaaring mawalan ng pananagutan ang mga mataas na opisyal sa kanilang mga salita at kilos.

“Hindi maaaring walang responsibilidad ang napakataas na opisyal tulad ng ating Bise Presidente,” ani Kapunan.

Gayunman, nilinaw niya na hindi niya itinuturing na si Duterte o ang kanyang pamilya lamang ang dahilan ng tumataas na karahasan sa lipunan.

Ayon kay Kapunan, may papel din ang social media, media, pamilya, paaralan, at sistema ng hustisya sa paghubog ng asal at pagpapahalaga ng mga kabataan.

Nanawagan siya ng mas malawak na pagtugon mula sa pamahalaan upang palakasin ang edukasyon sa mabuting asal, pagpapahalaga sa pamilya, at pananagutan sa komunidad.

Samantala, natapos na ng House prosecutors ang paglalahad ng ebidensya para sa Article IV ng Articles of Impeachment, na tumatalakay sa umano’y pagbabanta ni Duterte laban kina Pangulong Marcos, First Lady Liza Araneta-Marcos, at Martin Romualdez.