ISINAGAWA ng National Housing Authority (NHA) ang 51st People’s Caravan na napakinabangan ng mahigit 3,000 residente ng Pagadian City noong Agosto 20.

Sa ilalim ng patnubay ni NHA General Manager Joeben A. Tai, pinangunahan nina Region IX Manager Engr. Al-Khwarizmi U. Indanan at Zamboanga del Sur/Zamboanga del Norte/BARMM District Manager Engr. Jessa M. Consuegra ang inisyatiba sa Asenso covered court sa Plaza Luz.

Binigyang-diin ni Indanan ang layunin ng aktibidad na mailapit ang mga mahahalagang programa ng NHA sa publiko.

Naging katuwang ng NHA ang 35 partner agencies na binubuo ng mga pampubliko at pribadong institusyon.

Kabilang sa serbisyong inalok ay ang mga oryentasyon sa pagnenegosyo, job fair na may 68 posibleng job vacancies, oportunidad sa trabaho at pagpapahusay ng teknikal na kasanayan mula sa Cooperative Development Authority (CDA), Department of Labor and Employment (DOLE), Department of Trade and Industry (DTI), Department of Migrant Workers (DMW) Provincial Office, Public Employment Service Office (PESO) Pagadian at Technical Education and Skills Development Authority (TESDA).

Ang Department of Agriculture at ang mga attached agencies nito ay nagbigay ng iba’t- ibang serbisyo tulad ng KADIWA on Wheels at pagbibigay ng mga buto/punla.

Mga serbisyong medikal, pagbibigay ng mga gamot at libreng gupit, at libreng family planning at oryentasyon sa adolescent health ang handog ng Philippine Red Cross Zamboanga del Sur-Pagadian City Chapter, City Health Office, Armed Forces of the Philippines (AFP)-53rd IB, 1st Infantry (TABAK) Division, Provincial Department of Health Office (PDOHO), Philippine Pharmacists’ Association Zamboanga del Sur – Pagadian City Chapter, at Commission on Population and Development (CPD).

Naghandog din ng serbisyo ang Philippine Statistics Authority (PSA), Philippine National Police (PNP) – Pagadian City, National Bureau of Investigation (NBI), Department of Foreign Affairs (DFA), Land Transportation Office (LTO), PhilHealth, Social Security System (SSS), Pag-IBIG Fund at ang City Social Welfare Development Office (CSWDO).

Nagbigay ng mga halamang ornamental, mga punla, at aplikasyon para sa titulo ng lupa ang Department of Environment and Natural Resources (DENR); Sustainable Livelihood Program at iba pang kaugnay na inisyatiba mula sa Department of Social Welfare and Development (DSWD); libreng Wi-Fi at tulong sa e-GovPH mula sa Department of Information and Communications Technology (DICT) at libreng legal na konsultasyon mula sa Public Attorney’s Office (PAO).

Nagbigay rin ng suporta at logistical services ang tanggapan ni Pagadian City Mayor Samuel Co.

Sinimulang ilunsad noong Setyembre 2023, ang NHA People’s Caravan ay nagkaroon ng malaking epekto sa pagbuo ng mga sustenableng komunidad sa iba’t ibang lungsod at munisipalidad sa buong bansa.