INAMIN ni dating Office of the Vice President special disbursing officer Gina Acosta nitong na pumirma si Col. Raymund Dante Lachica ng acknowledgment receipt para sa P125 milyong confidential funds noong Disyembre 2022 ngunit kalaunan ay binawi nito ang dokumento.

Ginawa ni Acosta ang pahayag sa ika-17 araw ng impeachment trial ni Vice President Sara Duterte sa Senado.

“Binawi po ni Col. Lachica ang pinirmahan niyang acknowledgment receipt,” sinabi ni Acosta.

Tinanong ni private prosecutor Amando Virgil Ligutan si Acosta kung pinapirma niya si Lachica ng acknowledgment receipt ng ibigay niya ang P125 milyon.

“Nagpa-receive po ako, Your Honor,” sagot ni Acosta.

Tinanong din ni Ligutan kung bakit wala na kay Acosta ang pirmadong acknowledgment receipt na nagdodokumento sa pagtanggap ni Lachica sa pera.

Nauna nang tumestigo si Acosta na inutusan siya ni Duterte na ibigay ang P125 milyon kay Lachica, na noo’y security chief ng OVP.

Sinabi niya na ang cash, na binubuo ng P1,000 bills, ay winithdraw noong Disyembre 2022, inilagay sa apat na traveling bags at dinala sa OVP bago niya ibinigay kay Lachica.

Si Acosta, na idineklarang hostile witness, ang itinalagang special disbursing officer na may pananagutan sa cash advance.

Ang special disbursing officer ay empleyado ng gobyerno na awtorisadong tumanggap at maglabas ng pampublikong pondo at managot sa paggamit nito.

Tinanong din ng mga prosecutor si Acosta tungkol sa mga dokumentong ginamit kalaunan sa liquidation ng confidential funds.

Ang acknowledgment receipts na sumuporta sa fund utilization at liquidation reports ay ibinigay sa kanya ni Lachica.

Tinanong ni Ligutan si Acosta tungkol sa pagkakasunod-sunod ng pangyayari kung saan siya ang tumanggap at nag-withdraw ng P125 milyon bilang accountable officer, ibinigay ang cash kay Lachica at kalaunan ay nakatanggap mula rito ng mga dokumentong ginamit sa accounting ng pondo.

Wala pang pinal na pasya ang impeachment court kung lumabag sa mga patakaran ng gobyerno ang naturang arrangement.

Tinanong din ng prosekusyon si Acosta tungkol sa tree-planting activities na naunang isinama sa mga gastusin mula sa OVP confidential funds.

Partikular na binanggit ni Ligutan ang tree-planting activity ng OVP sa Masibay Integrated School sa Nunungan, Lanao del Norte noong 2026 at tinanong kung may confidential-fund plan para rito.

Sinabi ni Acosta na wala, bagaman naisagawa pa rin ang tree-planting activity.

Tinanong ni Ligutan kung bakit naunang siningil sa confidential funds ang tree planting gayong naisagawa ang Masibay activity noong 2026 nang walang confidential-fund plan.

Bahagi ang testimonya ni Acosta ng presentasyon ng prosekusyon sa Article I kaugnay ng mga alegasyon sa paghawak at liquidation ng OVP confidential funds.