SINABI ni Sen. Risa Hontiveros na nangako ang Meta na mas mabilis na makikipagtulungan sa Philippine law enforcement at magbibigay ng available subscriber information at traffic data kapag may natukoy na agarang banta ng karahasan.

Ayon kay Hontiveros, ibinigay ang commitment sa pulong noong Huwebes sa Singapore sa pagitan ng Philippine delegation at regional executives ng Meta, kung saan tinalakay ang child online safety, violent content at koordinasyon sa mga awtoridad.

“Napapayag natin, napa-commit natin ang Meta na ibibigay nila sa ating mga awtoridad ang subscriber information at pati traffic data once na may ma-identify silang banta sa kaligtasan ng ating mga bata, bago pa may mangyaring aktwal na pag-atake,” ani Hontiveros.

Hindi pa hiwalay na kinumpirma ng Meta sa isang pampublikong pahayag ang partikular na data-sharing commitment na inilahad ng senador.

Gayunman, sinabi ni Information and Communications Technology Secretary Henry Aguda matapos ang mga pulong sa Singapore na pumayag ang Meta at Roblox sa mas malapit na koordinasyon sa Philippine law enforcement, kasama ang iba pang child-safety measures.

May umiiral nang proseso ang Meta para sa official law-enforcement requests para sa account data. Ayon sa kumpanya, maaari itong tumugon sa emergency requests na may agarang panganib ng kamatayan o malubhang pinsala, alinsunod sa pagsusuri nito at sa naaangkop na legal requirements.

Ang subscriber information ay maaaring kabilang ang mga detalye tungkol sa isang account holder. Ang traffic data naman ay non-content records gaya ng pinagmulan, destinasyon, oras, petsa at tagal ng komunikasyon, at hindi ang mismong laman ng mensahe.

Ang pagkuha at disclosure ng computer data ng law enforcement sa Pilipinas ay saklaw pa rin ng mga prosesong itinakda ng batas. Hindi nangangahulugan ang commitment na inilarawan ni Hontiveros na may walang-kondisyong access ang gobyerno sa private user data.

“Ngayong mga matataas na opisyal mismo ng Meta na ang nangakong mas magiging maagap sa mga posibleng banta ng karahasan, dapat maging mas mabilis ang aksyon laban dito,” ani Hontiveros.

Sinabi ni Aguda na kabilang din sa mga napag-usapan sa mga technology company ang age verification, parental controls, mas mabilis na pagtanggal ng harmful content at mas malapit na koordinasyon sa law enforcement.

Iniugnay ni Hontiveros ang usapan sa isinusulong na Child Online Safety and Protection Act.

“Mahalaga ‘yan lalo’t isinusulong namin ngayon ang Child Online Safety and Protection Act, isang priority measure ng gobyerno. Mukhang handa naman ang Meta na higpitan ang safeguards nila dahil inabisuhan na namin sila na malapit nang pumasa ang batas na ‘yan,” ani Hontiveros.

May mga panukala ring nakabinbin sa Kongreso upang palakasin ang proteksiyon ng mga bata online, kabilang ang mga hakbang laban sa online sexual abuse or exploitation of children at child sexual abuse or exploitation materials.

Umiiral na ang Republic Act No. 11930, o Anti-Online Sexual Abuse or Exploitation of Children and Anti-Child Sexual Abuse or Exploitation Materials Act, na nagtatakda ng mga obligasyon at parusa kaugnay ng online sexual exploitation ng mga bata.

“Mahigpit ang bilin ko sa aking staff na hinarap ang Meta: Kailangang linawin sa kanila na hindi pwedeng pinagkakakitaan nila ang mga Pilipino sa Facebook, nang walang pananagutan sa laman nito. We will hold them to their word,” ani Hontiveros.

Ang lawak ng impormasyong maaaring ibigay ng Meta sa isang partikular na kaso ay nakadepende pa rin sa uri ng request, available records at umiiral na legal requirements.