QUEZON CITY — Maaaring bumaba sa 13 ang bilang ng mga boto na kailangan upang mahatulan si Vice President Sara Z. Duterte kung 20 senador lamang ang legal na makagaganap at makikilahok bilang mga senator-judge sa impeachment court sa oras na maglabas ito ng hatol, ayon sa isang interpretasyon ng Konstitusyon na isinusulong ng isang abogado na wala sa prosecution panel.

“Dalawang-katlo ang ating ina-apply dahil tingnan po natin ang batas—concurrence of two-thirds of all members. Hindi sinabing 16, hindi sinabing 24. Kaya nagbabago po ang bilang ng two-thirds, at nagbabago rin ang bilang ng ‘all members,’” diin ni abogado Howard Calleja sa Saturday News Forum sa Dapo Restaurant sa Quezon City.

Iginiit ni Calleja na dapat magbago ang denominator kapag may mga senador na legal o praktikal na hindi makagaganap bilang mga miyembro ng impeachment court, sa halip na awtomatikong gamitin bilang batayan ang buong 24 na miyembro ng Senado.

“Kung tatlo na po ang hindi makagaganap, 21 na lamang. Ano ho ang two-thirds ng 21? Doon po tayo titingin kung 13 po iyon o 14,” paliwanag ni Calleja.

Ipinaliwanag niya ang kinakailangang bilang ng boto kung 20 senador lamang ang aktuwal na lalahok sa impeachment court.

“Kung 20 po iyan, sa tingin ko, 13 na po,” diin ni Calleja.

Samantala, nananatiling posisyon ng House prosecution na 16 na boto ang kailangan para sa conviction, alinsunod sa unang ruling ng presiding officer ng impeachment court. Inihahanda naman ng Senado ang pagdinig sa mga constitutional expert bago muling isaalang-alang ang usapin.

Inimbitahan ng korte ang mga dating mahistrado ng Supreme Court (SC) upang talakayin ang probisyon ng Konstitusyon na nag-aatas ng pagsang-ayon ng two-thirds ng lahat ng miyembro ng Senado bago isagawa ng mga senator-judge ang oral arguments hinggil sa pinagtatalunang bilang ng boto.

“Ang bilang ko po rito ay depende kung sino ang mga senador na present at functional at makakalahok sa impeachment court,” paliwanag ni Calleja.

Binigyang-diin niya na sa kanyang interpretasyon, ang bahaging itinakda ng Konstitusyon ay maaaring magbago batay sa bilang ng mga senador na aktuwal na may kakayahang gampanan ang kanilang tungkulin sa oras na ilabas ang hatol.

“Kaya ganoon po ang bilang. Nagbabago po ito dahil, gaya ng sinabi ko, hindi naman itinakda ng Konstitusyon na 16, at hindi rin nito itinakda na 24,” ani Calleja.

Sa huli, ang Senate impeachment court ang magpapasya kung mananatili ang kasalukuyang 16-vote rule o gagamit ng ibang interpretasyon bago umabot sa pinal na botohan ang kaso ni Duterte.