NAGHAIN ng kasong cyber libel si Manila 2nd District Rep. Rolan Valeriano laban kay Cavite 4th District Rep. Francisco “Kiko” Barzaga umaga ng Miyerkules sa Manila City Prosecutor’s Office.

Nag-ugat ang paghahain ng kaso ni Valeriano sa ipinost ni Barzaga sa kanyang Facebook account hinggil sa umano’y pagtanggap ng suhol ng mga miyembro ng National Unity Party (NUP) kung saan siya kabilang, mula sa negosyanteng si Enrique Razon sa iba’t ibang pagtitipon sa Solaire bago ang 2025 election para umano suportahan ang kandidatura ni dating Speaker Ferdinand Martin Romualdez.

Ipinaliwanag ng kongresista na walang dahilan para suportahan si dating Speaker Romualdez sa kanyang kampanya sa nakalipas na halalan dahil wala naman siyang naging kalaban.

Nalimutan na aniya ni Barzaga ang kanyang responsibilidad bilang kongresista at ang inaasahang kagandahang asal bilang miyembro ng Kongreso.

“Baseless accusations of bribery are not harmless political commentary. They are accusations of criminal conduct, broadcast to the public as if they were established fact. If you claim that legislators were bribed, then you have the duty to prove it. Otherwise, it is a malicious attack designed to destroy our reputations,” pahayag ni Valeriano.

Tiniyak pa ni Valeriano na kahit pa magkasundo at mag-public apology si Barzaga ay itutuloy pa rin niya ang inihaing kaso laban sa kapuwa kongresista.

Ito na ang ikatlong cyber libel na kinakaharap ni Barzaga matapos maghain ng kahalintulad na kaso laban sa kanya si Razon sa Makati City Prosecutor’s Office, at si House Deputy Speaker at Antipolo Rep. Ronaldo Puno sa Antipolo City.