SINABI ni Rep. Joel Chua na handa na ang prosecution panel ng Kamara na gampanan ang kanilang mandatong konstitusyonal at maglahad ng ebidensya sa harap ng impeachment court ng Senado sa paglilitis kay Pangalawang Pangulong Sara Z. Duterte.

Si Chua, isa sa 11 miyembro ng House prosecution panel, ay naglabas ng pahayag matapos magtipon ang Senado bilang impeachment court para sa paglilitis kay Duterte, na nahaharap sa mga alegasyon kaugnay ng maling paggamit ng pondo ng bayan, hindi maipaliwanag na yaman, at mga banta laban kay Pangulong Ferdinand “Bongbong” R. Marcos Jr. at iba pang opisyal.

“Kinikilala namin ang pagbuo ng impeachment court ng Senado para sa paglilitis kay Vice President Sara Duterte,” ani Chua, na miyembro ng House Committee on Justice at chairman ng House Committee on Good Government and Public Accountability.

“Bilang mga miyembro ng House prosecution panel, inaasahan naming gampanan ang aming mandato sa ilalim ng Konstitusyon nang may kaseryosohan, disiplina, at paggalang sa proseso,” dagdag niya.

Ang pagbuo ng impeachment court ay naganap matapos ang ilang linggo ng tensiyong pampulitika sa Senado, kabilang ang pagbabago ng liderato at kontrobersiya na kinasasangkutan ni Sen. Ronald “Bato” dela Rosa, isang kaalyado ni Duterte na hinahanap ng International Criminal Court kaugnay ng kampanya kontra droga ng nakaraang administrasyon.

Binigyang-diin ni Chua na ang kasong ito ay bahagi ng mekanismo ng pananagutan sa ilalim ng Konstitusyon para sa mga opisyal na maaaring ma-impeach.

“Ito ay isang tungkuling konstitusyonal na ipinagkatiwala sa House of Representatives, lalo na sa mga usaping may kinalaman sa pananagutan ng mga opisyal ng gobyerno na maaaring ma-impeach,” diin ni Chua.

Inaasahang uusigin ng House panel ang kaso sa harap ng mga senador na uupo bilang mga hukom, kung saan kinakailangan ang boto ng dalawang-katlo ng Senado para sa hatol na pagkakasala, na maaaring magresulta sa pagpapatalsik at diskwalipikasyon sa paghawak ng pampublikong posisyon.

Ipinahayag ni Chua ang kahandaan na sundin ang mga proseso ng impeachment court habang tinitiyak na maipapresenta ng Kamara ang kanilang kaso sa tribunal.

“Handa kaming maglahad ng ebidensya sa harap ng impeachment court at sumunod sa mga legal na kautusan, direktiba, at proseso nito,” pahayag ni Chua.

Dagdag niya, ang agarang tungkulin ng panel ay tiyaking maayos na maririnig at masusuri ang mga ebidensya sa harap ng impeachment court ng Senado.

“Sa yugtong ito, malinaw ang aming tungkulin: tiyaking maririnig ang mga katotohanan, masusuri ang ebidensya, at maisasagawa ang proseso sa paraang karapat-dapat sa tiwala ng sambayanang Pilipino,” dagdag ni Chua.